「都係為咗你先走啊。」移民的你有無向孩子說過這句話？籌備、出發、睇樓、搵工、撲學校⋯⋯大人忙著安頓，也許會忘了聆聽小朋友對陌生環境的感受和適應，「有小朋友嚟到之後被老師睇到行為異常，家長先發現個仔有 PTSD（創傷後遺症）。」移英 19 年的牧師 Kan，在服務的地區發現不少家庭抱走難心態移英，忽略小朋友的情緒，加上家長可能英文水平有限、對英國的醫療系統又不熟悉，種種因素令親子間越走越遠。
她與移英不久的記者任美貞，去年中成立組織「心泉 HONG KONG WELL」，關注移英學童情緒，為家長提供免費支援，目標今年可籌募更多資金，為有需要家庭提供廣東話輔導，「點樣將父母嘅心轉向兒女，兒女的心轉向父母？心泉能夠輔導到小朋友時，其實同時係幫助到家長、成個家庭嘅關係，係我哋最想做到嘅嘢。」
自前年BNO簽證牽動的移民潮，移英 19 年的港人牧師阿 Kan，在服務的倫敦西南部如 Sutton 及 Kingston 等，成了香港人落腳熱點。可是她說，這批移民與昔日華人移民不同，不少走得又急又低調，「可能係擔心喺香港太高姿態會走唔到咁」。有家長前年 9 月攜兩子以 LOTR 赴英，「家長心態係走難式咁走，小朋友都唔知道咩事。細仔以為係度假，問幾時返屋企」。而未滿 10 歲的大仔，被英國老師發現行為異常，課堂內無法集中精神，會被一些小事觸動神經，告知家長跟進後，才發現大仔患上創傷後遺症（PTSD）。學校隨後安排小朋友見輔導，「家長話都係要等啦，同埋要講英文，話唔知人哋講乜。」
她從中發現，當大人用英文有困難，同樣小朋友也無法把心事轉成以英文抒發，當地老師或輔導人員亦未必有相同的香港語言、經歷或文化，多重障礙下，小朋友心結更難解開，「家長走得咁急，所有嘢小朋友都看在眼裡，但係佢哋呢啲諗法點樣表達呢？可能啲情緒就去咗表現度。呢個 case 仲要係學校內 settle 好、唔係講緊好難適應，上咗一個學期堂，問題先浮面。」
她表示，家長要處理的事已經很多，本身也要適應新環境，當小朋友出現情緒困擾，家長只會更難受，「大人嚟到真係好忙，要搵工搵屋搵學校，又要認下路睇下邊度買餸，呢啲係好硬件式嘅嘢。但當三個月之後安頓好，嗰陣嘅情緒先至出返嚟。」她說，聽到 10 歲童個案時感到十分心痛，「個小朋友咁細個，之後佢要點走落去？」
阿 Kan 機緣巧合下認識移英不久的記者任美貞，二人一同創辦「心泉」。任說，女兒兩文三語流利，以為女兒可輕鬆適應英國校園，事實卻不然，「作為媽咪，原來忽略咗個女嘅感受。」任表示，籌備「心泉」過程中，接觸不少移英家庭，發現小朋友的情緒和適應狀況比想像中嚴重，例如有小朋友突然變得易哭或「痴身」；年紀較大的青少年因朋友都在港，會埋怨父母帶他走；也有小朋友英語是母語，移英後仍遇上困難。
任續指，還有不少父母未放下香港追求成績的想法，「好驚搵唔到學術成績較好嘅 grammar school，就點都要搵間 outstanding 嘅學校。甚至同小朋友講讀住先，排到更好嘅再轉校。但有無諗小朋友想法？小朋友都要適應。」她說，英國學校比香港更少功課，甚至不會有成績排名，對在港「操開卷」、「分數至上」的學童，「未必個個學生都覺得更開心，分分鐘係成個人生目標無咗。」
Kan 說，「心泉」團隊都是港人臨床心理學家、藝術治療師與社工等專業人員，現時全屬義務相助。因資源有限，暫無法提供完整的輔導服務，但可先為小朋友進行廣東話的精神評估。部分小朋友只是適應出現困難，未必是心理健康有問題，「心泉」會支援家長處理，「家長一心過嚟為小朋友好，但可以點處理得更好？以前嗰代可能係家長嘅話小朋友就要聽，但呢一代開始，係家長要聽返小朋友講嘢。家長要明白，係因為愛個小朋友，所以願意謙卑地去聽小朋友嘅想法。」
「心泉」的原意是擔任橋樑角色協助有需要的父母。成立至今半年間正式接手約 10 宗個案，年齡介乎 5 歲至 15 歲，「未必咁多父母願意一嚟就講，要建立一定嘅信任，佢哋先肯講。」亦特別關心青春期學生的情緒波動。若學童情況較嚴重，就會協助以英文撰寫評估，轉介個案至家庭醫生（GP）和 NHS 跟進。
Kan 又說，NHS 廣東話翻譯員不一定來自香港，「廣東話（翻譯）已經好少，當家長去訴說心聲，談及香港嘅問題時，遇到一個廣州人翻譯，未必好理解。始終有文化差異，而醫生亦未必識分。」她說，如今年能募集到更多資金，就可為有需要的個案提供港人廣東話輔導服務，並希望組織地區聚會，讓家長互相分享經歷，「等大家有啲共鳴，唔好覺得孤單。因為英國嘅精神健康系統比較複雜，每個 council 都唔同，由家長第一身去分享經歷，所住嘅地區係點跟進，學校嘅支援係點，都比較重要。」
Kan 指，「心泉」也會透過地區校網，尤其是港人較多的學校，向英國老師講述香港學童曾經歷的社會狀況，讓老師更明白學生心情。而稍後將舉辦講座，鼓勵家長求助和及早發現問題，「點樣將父母嘅心轉向兒女，兒女的心轉向父母？如果心泉透過輔導小朋友，同時幫到家長，甚至成個家庭嘅關係，會係我哋最想做到嘅嘢。」
