區家麟除了是「資深傳媒人」，亦是不少傳媒行家眼中的好老師，他在母校中大新傳學院教授的科目「新聞敍事技巧（Storytelling in Journalism）」，多年來都是學生的搶手科，一席難求。無論課堂內外，大家都可見到他對新聞和教學的執著。他總向後輩強調，說得出好的故事，才有好的新聞；若題目無法令你著緊，沒有「火燒心」的感覺，不如不做。《同文》訪問了數名區家麟的現屆學生和過去的後輩，講講他們眼中的這位良師。
今年區家麟仍有繼續教學工作，Year 4 的 Brian 正是他今年「新聞敍事技巧」的學生之一。昨天（11日）他睡到九時多才醒過來，母親一走入睡房就說：「你老師畀人拉咗喎。」還未完全清醒的他一下子也無法意識到是誰。他看看手機，才發現同學們已對「區博」被捕議論紛紛。
區家麟的課堂原本逢星期一上堂，Brian 本來前晚已向他發電郵，說要向他諮詢 Final Project 的意見 。無奈收不到他的回覆之餘，昨天亦無法上堂。
今個學期在一月開課。大概因為發生過《立場新聞》事件，該科目本身只有 20 個位，Brian 記得，第一堂課的課室內卻坐了三十多人。那天區家麟已跟學生說，他對隨時被捕已有心理準備。Brian 形容，這些事他總說得淡淡然，沒有流露太多。
Brian 最深刻的是區家麟總向他們說，做記者就是要找「火燒心」的題目去做，「一啲自己唔鍾意、或者要妥協嘅題，就唔應該係記者要做嘅嘢…..呢啲都係佢個 course 或者佢自己好強調嘅信念」。另一個學生 Cindy 亦表示，區家麟總希望學生做一些主流媒體不關心的議題，「佢話只要我哋做一啲真係好想做嘅 topic，就會做得好，唔好理主流媒體嘅規限」。
今年的課堂踏入 2 月後，就全面變成網課。「佢成日都喺度話，大家返嚟啦，都唔知見得幾多次。」Brian 憶述。Cindy 指，區家麟對無法與學生面對面交流感到十分氣餒，他曾隔住螢幕，呼籲各同學打開視像鏡頭：「但我哋都好少開 cam。佢有時好搞笑，自言自語話：『好似同緊黑洞講嘢呀。』」
近日香港的疫情數字開始回落，Cindy 指經「區博」多次爭取後，今個學期的最後一課將可恢復面授，同學們可回到校園，一同欣賞各自拍攝的 Final Project，「佢係非常之咁期待我哋呢個實體嘅放映會」。
前立場新聞記者林彥邦 2005 年在《無綫新聞》實習時，初次認識區家麟。那時他擔任實習學生的「校長」，負責照顧這班初出茅廬的小伙子。當時區雖然已得過不少新聞大獎，又主持《新聞透視》多年，但林彥邦形容，他面對實習生全無架子，總是平起平坐地跟學生們打招呼、說笑。「（畢業後）十幾年嚟，我哋成屆（實習）都係會同佢 keep in touch，一齊開過幾次聖誕 party。」
當時的區家麟，已對「說故事」有種執著，「（區說）點樣寫好一篇新聞，其實係有關於點樣講好一個故仔。唔係硬塞所謂嘅資訊畀人，而係要講一個故事畀人聽，令人聽落去」。
十幾年後，林彥邦在《立場新聞》與區家麟才再次在職場上相遇。對比起無綫期間，林覺得區不止老了很多，而且可能因為食得清淡，身型瘦削，又愛著麻質衣服，總帶點滄桑：「有別於其他傳媒老闆，與其話佢有咩資深傳媒人嘅氣場，反而比較似一個粗衣麻布嘅文人。」
在林眼中，區的文章亦恰如其人：「唔係辭鋒犀利、有氣勢嘅質問，唔係咄咄逼人，要將人誅死，而係好溫柔、婉轉咁講道理、講故仔。」
「我哋而家睇到嘅情況就係，佢都唔求啲咩名利啦，一直都係教下書，寫下文，用佢自己方法去講呢個地方嘅故事，甚至佢其實冇講過啲咩好激烈、好激動嘅嘢……但一個咁樣嘅 storyteller 係咁樣嘅結局。」
《立場》停運數週後，喜愛通山跑的區家麟帶一班前立場員工去行山。林形容，那時的區博仍一如往常，未見有特別失落，身體狀況仍比一班「後生打壞」好得多。那天林不小心將手機跌進四、五米深的石隙之中：「區博話：『得㗎喇，你企喺度唔好郁。』」區三扒兩撥就鑽進了石隙中，救回電話。
那陣子，不少人勸區家麟離開。林彥邦亦向他詢問過，區家麟只輕輕回應一句：「去到呢個年紀，咪當找數囉。」
林哽咽說：「佢用自己嘅方法行咗呢條路咁耐，佢決定去留低。喺《明報》專欄，佢形容某啲傳媒老闆，其實係『以身殉道』……佢要走佢走到㗎，佢選擇咗要留低，去找數又好，去貫徹自己（理念）又好，做學生、做後輩嘅，只可以祝福佢。」
在林彥邦心目中，區家麟一直都是行內極少數值得崇拜和仰慕的 role model：「如果我預想自己去到五十幾歲，回望自己作為一個記者、傳媒工作者嘅歷程、生涯，你會希望自己可以變到好似區家麟咁樣。」
「但而家呢個社會，呢個法律就話畀你知，咁樣係一種罪。」
即將在今年畢業的 Cindy，早自蔡玉玲因查冊被捕開始，已對繼續入行有懷疑，及後香港所發生的事，更令她起了移民的打算：「我會想走，但佢（區）就會係嗰種，好唔想走，想留喺香港……（我）有啲慚愧。喺呢個時代之下，唔同人嘅唔同決定。我會好 respect 佢哋。」
經歷過新聞行業近年的多次衝擊，Brian 仍未打消做記者的念頭，但今次身邊的老師被捕，對 Brian 而言帶來更大動搖，「我尊敬嘅、咁貼身嘅人都畀人拉咗，真係有個思考究竟繼唔繼續……佢都算係一個溫和嘅人，但咁樣都畀人拉咗。我第時點樣寫嘢呢？再溫和啲？定根本寫都唔寫得呢？」
深夜 11 時 35 分，區家麟獲保釋，步出葵涌警署，說了一句：「感謝大家關心。」但願他繼續平安，回到班房，今次聽學生說故事。
