移加賣鴨油辣椒油 承傳婆婆秘方 設計加入香港元素助推廣文化 共同創作者Louise:香港人嘅brand run住香港靈魂

一樽鴨油辣椒,承載着一對加拿大港人夫婦對香港文化的承傳。Holy Duck Chili Oil(好得鴨油辣椒)共同創作者(co-creator)Louise 說,「我想擺個產品出嚟係講到一個故事,每一個產品、每一個圖案都係一個故事,話到畀你哋知關於香港嘅嘢」。

這份家傳食譜辣椒油是出自 Louise 的婆婆,當年從中國走難到香港,婆婆曾隨不同廚師學藝,現在由 Louise 和丈夫把它帶到加國,「將辣椒油帶到溫哥華特別有感觸,好似將上一代嘅移民故事,帶到另一個移民城市。唔少新移民可能會感覺好孤獨,搵唔到人可以同佢經歷有 resonate(共鳴),希望呢個辣椒油令佢知道 you are not alone(你不是孤單一人),你都可以有自己嘅故事」。 


兩年多前,80 後、在港從事教育工作的 Louise 隨加籍丈夫 Chris 移民溫哥華,並於去年 7 月創立 Holy Duck Chili Oil。Louise 說創業的心很純粹,源於去年農曆新年疫情升溫,「身邊親戚年紀比較大,唔方便見面,於是同 Chris 構思一份禮物送上門口,聊表心意⋯⋯咁送啲咩呢?新年會食糕點,蘿蔔糕、芋頭糕,不如整辣椒油,然後問媽咪拎家傳食譜」。然而,辣椒油是 Louise 的婆婆食譜,「因為婆婆嘅年代花生油係好珍貴,而婆婆一家有八口,如果用花生油煮嘢食太貴,咁有咩剩就用個樣嚟煮嘢食,用雞油、豬油、鴨油呢啲餸頭餸尾煮嘢食,養起成頭家」。由於婆婆常用鴨油煮食,發現鴨油的甘香配上辣椒,煮出來的辣椒油實在是一個絕配。

Holy Duck Chili Oil 是 Louise 外婆的食譜,但外婆去年不幸去世,無緣嚐到辣椒油,但 Louise 說成品與婆婆味有九成相似。(受訪者提供)

不少親友嚐過這款辣椒油後大讚,令未曾在加國創業的二人膽粗粗地開始研究,很快就迎來第一個難題。「做食品生意最難係搵到一個合適嘅廚房,加拿大係十分注重食物安全,同廚房規格係咪適合製作商業食品。」Louise 說,尤其在疫情期間有不少人租用共享廚房製作食品,「聽聞依家共享廚房排 waitlist(等候者名單)係去到三個月至半年,而且租廚房亦唔平」。幸而,經朋友認識一位經營咖啡店的東主,以友情價租用其咖啡店廚房,生意才能起步。她建議,有意在加拿大創立食品生意的港人,可嘗試認識當地經營餐廳的港人,看看是否有合作機會。

溫哥華生活節奏出名慢,亦是加拿大適合退休的城市之一,但 Holy Duck Chili Oil 由構思至推出市場,大概用了半年多的時間。二人創業速度之快,Louise 道出「成條路都係由好多香港人、在地做飲食業朋友鋪出嚟」,笑言「係攞住香港心跳同節奏(創業),有香港人嘅 competitive edge(競爭優勢),做生意你唔會 prepare to lose(輸的打算),所以你會見到香港人做生意﹐係會有香港人嘅節奏」。

Louise 和 Chris 於前年 2 月移加,一星期後 COVID-19 爆發,Louise 說因疫情且剛剛到埗無所事事,所以自己常常在家插花,令心境平靜;Chris 則經常去打哥爾夫球。(受訪者提供)

在設計辣椒油包裝時,Louise 和 Chris 刻意加入很多「香港」元素,「(Holy Duck)中文名『好得』係想玩食字,『Duck』中文即係『得』,廣東話成日都話好得好得」﹐而包裝上不同鴨的造型亦是出自香港藝術家,中文字體則參照「九龍皇帝」曾灶財墨寶,整體感覺充滿「香港味」。「我想個 brand(品牌)係一個全部由香港人 contribute(貢獻)嘅 brand,入面 run 住香港靈魂」﹐而每個產品設計都是關於香港文化,「例如避風塘文化,好多人都會聽過避風塘炒蟹,但唔知香港真係存在過一個避風港,你會聽過 Aberdeen(香港仔),但唔知嗰度曾經泊咗幾千隻船,亦唔知以前啲人可以喺船上煮嘢食」。

Holy Duck Chili Oil產品有鴨油辣椒(中),亦有鹹蛋辣椒(左)和避風塘嬸嬸(右)。(張凡 攝)

Louise 希望通過產品引發人的好奇心,「試過有外國客問點解隻鴨戴帽、點解其中有產品叫『避風塘嬸嬸』,我會同佢解釋返原來喺船上面煮嘢叫船家嬸嬸,不過呢個產品亦因為可以糝落食物度,廣東話叫呢個動作做糝,所以用埋英文同音『sum sum』」。這一來可以向客人介紹香港文化,二來他們又可以學廣東話,「佢哋好鍾意講我哋啲 product 名」。最重要是溫哥華住了很多華人,可能是移民第二、三代,他們下一代可能不懂廣東話和中文,「見啲鴨仔咁得意,小朋友會問係咩嚟,畀機會家長可以透過食同小朋友講吓香港嘅故事」。

為了保存消失的香港文化,辣椒油包裝字體上特別參照「九龍皇帝」曾灶財的墨寶,以前喺香港有過萬個字跡,但大家都知冇咗,原因係有一段時期香港地產大亨收購啲地,會洗咗條街嘅字。原來香港經歷過呢個轉變,我想有機會去講呢個故事」。她續說「我哋架公司車都黐咗 Holy Duck 個 logo,每次出去都好似攞住九龍皇帝嘅 graffiti(塗鴉)一路喺溫哥華遊走,一路泊,雖然佢嘅塗鴉未必會再喺香港街頭出現,要喺博物館先見到,但我想將佢小小嘅 artwork(藝術品)帶過嚟呢度,畀多啲人欣賞到依個流動嘅塗鴉」。

Louise 和 Chris 早前駕公司車去打疫苗,在車上休息時,有幾個香港家庭對車身印有「九龍皇帝」墨寶的公司標誌感到興趣,「聽到呀媽同個仔講,呢個字體係點點點,有啲人敲我個窗話有食我隻辣椒油,我哋呢架車就好似攞住九龍皇帝嘅 graffiti 遊走」。(受訪者提供)

Holy Duck Chili Oil 開售至今逾 9 個月,現時有 10 個售銷點售賣,亦可透過網上落單。除了鴨油辣椒(每樽 18 加元),亦有鹹蛋辣椒(每樽 28 加元)和避風塘嬸嬸(每包 15 加元),「鴨油辣椒辣度係屬於溫和,蒜頭炸過充滿口感,我哋最鍾意、首推係用嚟拌飯,其次係煮啲蛋類同小炒,concept 係希望將依種家常菜味道 apply 落去你嘅日常食譜中,即使係隔夜餸,你攞佢嚟炒飯都好好食」。Louise 說,坊間或對鴨油有誤解,以為是不健康,但其實有實驗顯示鴨油健康價值不輸橄欖油,認為現在是宣傳鴨油的時機,希望帶出食物多樣化(food diversity),又透露未來會研究素辣椒油和香港小食調味品,例如甜醬、麻醬等。

現時 Holy Duck Chili Oil 有 10 個銷售點,Louise 透露客群中一半是外國人,另一半是亞洲人。(受訪者提供)
上一篇文章

應 200 名前職員聯署 聯合國秘書長今抵莫斯科與普京會談

下一篇文章

加國小企環境互相支持 創業擁自主權可實踐企業良心 移加港人Louise:令我可以瞓得安樂

相關文章