買一塊冬瓜，你願意付出多少錢？「共同種植」的概念，農夫黃如榮一直心心念念——移英後重拾鋤頭，機緣巧合遇到移民多年的港人分租「格仔田」予他一同種植。他認為，香港受限環境等因素，對絕大部分出生在石屎森林的香港人來說，農業或僅限於屋苑的花槽；來到英國，不少港人反而嘗試學習種菜，「當你學識種嘢就會自己種，當你識種時而要去買菜，就會睇嗰棵菜嘅價值而唔係佢嘅價錢，無形中就係支持咗農業」。
黃如榮在新莫爾登（New Malden）的家，種滿港人常吃的瓜菜。多走兩步，則是辣椒等植物，「嗰邊係隔離屋㗎」。新莫爾登有不少韓國人聚居，榮哥的鄰居正正是韓國人，他說韓國鄰居看見他家後園的農作物感到好奇，兩家人徵得業主同意，就直接把分隔兩屋的木圍欄拆掉，成了一塊更大的農田。現時韓國鄰居同時保留部分後園晾衣和放兒童彈床。
榮哥續說，他另一邊的鄰居是歐洲人，雖然未有拆走圍欄，但該鄰居的果樹已交予他打理，早前才摘完蘋果，「韓國人再隔離嗰家人，喺二樓望到我哋後園，又話想一齊種植，不過業主好似唔俾佢拆圍欄哈哈」。他說，正與區內的童軍商討，在他們的會址開僻小農田，讓年輕人也嘗試種植。這正是他所推動的「共同種植」概念的體現。
除了推動街坊種植，榮哥說，英國不少社區有「格仔田」（allotment），該些土地由政府持有，市民可向當區議會以低價申請租田種植，但該些作物不可出售圖利，只能自用。他指，自去年底抵埗，就嘗試去不同「格仔田」外守株待兔，「只為咗等人嚟俾我問下嘢，因為佢大門深鎖，又天寒地凍，又lockdown無人出街。等咗兩三禮拜先至有一個人嚟，可以跟佢入去望下入面咩環境」。
他表示，當下向政府提出申請後獲回覆「格仔田」已沒有空位，「好想排，所以都申請咗，話我係waiting list第24個，即係要等約5年。因為好多都種咗廿幾三十年，要直到佢哋quit咗、即係死咗先會有位騰空返」。不過訪問當日，榮哥卻拿著他家附近「格仔田」的鎖匙。
原來中間又有段故——榮哥說有次擺農夫市集，被媒體影到自己放了上網，有個移民英國多年的港人看到照片後，發現原來有港人農夫擺檔。而那名移英港人正巧在他家附近的「格仔田」種植，輾轉經朋友介紹下，二人得以認識。他說，那名港人並非做種植出身，因想找專業農夫一起打理其「格仔田」，於是就向council申請，讓榮哥能以co–worker方式在「格仔田」內種植，「係遇到貴人，好好彩。」
榮哥續說，因適逢當地部門有相關活動，自己就膽粗粗走去與官員面談，解釋自己的理念，故co–worker的申請由提出至批核成功只用了3天，收到回覆時更正好是他的生日，「真係當日最後一份生日禮物」。他稱，由於「格仔田」內的作物不可出售，所以田內只進行實驗性質的種植，例如試種小棠菜、絲瓜和冬瓜等港人愛吃的蔬菜。
回想在港經營的農場，榮哥稱，一心想提升本地自給率，「多啲人食返自己地方出產嘅農作物」，亦曾多次與港府討論農業政策。然而港府提出農業園和農業發展基金等，對農夫幫助不大，缺乏政策支持成為本地農業難以持續發展的主因；相反更能受惠的農業優先區，就連研究也無了期，「如果有農業優先區，就唔會有馬寶寶農場被迫遷、新界東北收地，或者好多農地被荒廢、被更改用途嘅情況，咁農夫就可以繼續發展。」
「香港唔少農場無法擴充，其中一個原因係你今年租完幅田，明年可能已經續租唔到，你仲會唔會投資？」榮哥說，自家農場也不敢作長線投資。雖然政策上更改土地用途要通過城規會，以前有不少綠色團體幫手「頂住」，但現時的政治氛圍，過往站得較前的團體也要退下來，農地一旦要被改劃，也變相沒有太大阻力了。
「其實個農業唔係淨係自己種緊菜，而係同大家嘅生活、環保、健康好有關係。既然農業有其重要性，咁付出嘅就唔淨只得農夫，而係成個社會。」榮哥說，在香港種植，往往受制於環境的不容許，令港人與農業相距很遠，「我住大廈無陽光、窗台都放唔到棵作物；無地又種唔到菜。小朋友一出世就喺石屎森林，見到嘅植物就係屋苑樓下花槽。食嘅（農作物）係買返嚟、進口嘅，大家只當農作物係product，但我覺得咁係唔健康，每個地方都應該負責返佢自己嘅糧食」。
時人不識農家苦，榮哥說，現時在英售賣菜苗，是令港人接觸種植的第一步，「當你學識種嘢就會自己種，當你識種時而要去買菜，就會睇嗰棵菜嘅價值而唔係佢嘅價錢。無形中就係支持咗農業。就好似買一塊冬瓜，大陸入口嘅可能7蚊買到，但喺本地農夫買要20蚊，你都會覺得值得。你俾緊嘅錢係支持緊本地農業嘅價值。」
「當見一見律師都要俾錢，買其他product你就咁豪爽時，點解去買農夫嘅產品就咁吝嗇？當你試過每晚去捉下鼻涕蟲、趕下雀仔，就自會明白」。
Comments are closed.