在農田裡呱呱落地，他比任何人都討厭耕作；奮發擺脫鄉土，攀到高薪厚職，卻又不忍農作物被污染。那小伙子毅然決定脫下西裝，拾起鋤頭。他總是問道：「香港人可唔可以食返香港菜？」默默耕耘11年，當自家伊甸漸有起色成為少數有能力擴充的香港農場之際，卻迎來政治暴風雨，只好再把鋤頭長埋黃土，舉家連根拔起遠走英國。在英式後園種滿「香港菜」，轉賣菜苗力推「共同耕作」，「我流嘅係農夫血，我係田中之子」，黃如榮這樣去介紹自己。
走進黃如榮（榮哥）倫敦新莫爾登（New Malden）的後園，甫入眼前的數行農田，竟種滿港人熟悉的菜芯、紅菜頭和生菜；放在旁邊的「盤栽」，正是這些蔬菜的幼苗。「嗰陣都係買種子試，我未經歷過咁凍，唔知會唔會發芽」，榮哥說，雖然英國較寒冷，菜芯、西蘭花、小棠菜和青白菜等種植時間較香港長，但總算有收成。
「我唔會用鐘意嚟形容囉」，談起耕作，生於農民世家的榮哥劈頭一句，「我自細就好憎種植，好憎抆草，好想出去做個白領。點解唔嘆冷氣要俾蚊叮蟲咬？」所以他拼命讀書考上大學，「就係想脫貧，離開農夫呢個行業。」結果「鄉下仔」夢想成真，走到一間小型電子公司擔任總經理，「每日返公司就係搵啲嘢做下⋯⋯諗下去邊食晏、去邊行下」，後來成家立室，「都叫小康，上到岸。」
榮哥憶述，那時他經常北上巡廠傾生意，不少深圳、惠州及東莞等工廠均是位於「開發區」，「開發區即係農田推平，跟住喺上面開廠。政府會俾優惠吸引你去開廠，裡面任你玩，啲污水倒去後面農田無問題㗎。而後面農田就係用嚟生產蔬菜，賣俾（工廠）飯堂嘅伙記食。」
「作為農民出身嘅人，睇見農地咁樣被破壞，睇見啲菜係咁被污染，個心開始唔舒服」。有次在大陸工廠附近遇上農夫把收成的菜擱在路邊，「我問佢啲菜係咪又交去工廠，佢話轉頭交去香港㗎。我話落香港嘅菜要攞牌㗎喎，佢話呢啲有人做。落到香港咪又係去街市，咁你就知道，有咩政策就有咩對策。」
「𠴱刻發覺，受害嘅唔止當地嘅人。你喺呢度（大陸）唔食（菜），咁返到香港都唔食咩？香港人可唔可以食返香港菜？」抱著這個疑問，他作了一個瘋狂的決定，「雖然自己著住西裝，但身體裡面流緊嘅仍然係農夫嘅血。我係田中之子，阿媽喺田度生我，我唔係醫院出世。對於我來講，只要願意返去，我就係農夫。」
於是他回歸元朗錦田老家附近，租了一幅小小的荒地開墾，「本身暪住阿媽，但隔籬鄰舍見到，走去同我媽報寸。結果阿媽親自行嚟田度見到我真係耕田，嗰下差啲激死，嬲咗我唔出聲。阿爸阿媽都想你脫貧，做到總經理上晒軌道，突然唔做返嚟耕田？」
「但我覺得有種使命，作為田中之子嘅使命。」他指，在香港經營農業很困難，但香港人想食到香港菜，前提是不可再讓農夫犧牲，「我個農場叫『歐羅』，因為歐羅係錢嚟。農夫唔向錢看就死硬，要提醒自己要向錢看，我一定要營運到個方式出嚟令農夫可以生存到。」
農夫鬥志一燒就11年，由2010年的7斗地（逾5萬平方呎）發展至今的20多斗地，成為本港少數可擴充的有機農場。榮哥說，去年還訂下五年大計，目標令生產更有效率，希望可讓其他農夫參考，亦令務農變成一項專業，洗脫農夫「又老又落後」的印象，「『師』係尊稱，我希望農夫以後可以被尊稱為『農業師』。」
不過宏願未結果，政治低氣壓已席捲全港，「我兩個仔都讀緊中學，後生仔你嗌佢唔好出去衝都幾困難。我哋做父母嘅其實做唔到啲咩，所以太太好擔心，壓力好大」。妻子提出希望讓兒子赴英升學，自己和兩子本來不想移民，「其實都無乜路你揀，爸爸得你一個可以做，農夫你唔做仲有其他人接替。」
面對陌生的環境和天氣，54歲的榮哥說，移英前已立心不再耕作，「無論精神定實物上都放低咗個鋤頭，總之生活到就算，始終喺香港已連根拔起」。在那程飛往倫敦的客機上，翻到一篇採訪自己的報道，耕作苦與甜隨即一湧而上，「農夫血」再次沸騰，「難得重新生活，係咪要再一次跳落呢個火盤⋯⋯生活係要照顧，但會唔會試下推動英國農業呢？」
到埗時正是英國最嚴寒的12月兼遇着封城，兒子們找學校的電郵石沉大海，一度感到徬徨，但他仍趁機買種子回家測試寒天和室內的發芽狀況。後來天氣轉佳，妻子和兒子都找到工作和學校。他說，早在抵埗時見到農夫市集（farmers market）已心思思想加入，但市集因封城至今年5月才重開，直到6、7月他才正式擺檔。市集一個月才舉辦一次，不足以維持生計。榮哥靈機一轉，主力網上售賣菜苗。
由賣蔬菜轉賣菜苗，榮哥坦言因暫未能開設農場，自家後園地方有限，產量亦有限；加上不少港人移英後的新居都有後園，可嘗試自行種植，結果反應不俗，「香港人因為喺香港做唔到，所以嚟到都對種菜苗興趣大，我就諗下點樣教佢哋」，甚至會協助有興趣的港人將後園轉為農田。
兩度掙脫，兩度回頭。他知道，今次比上次放棄安穩生活的犧牲更大⋯⋯離開出生的土壤、離開經營逾十年的農場、離開年邁的家人，「過去十年當然有軟弱嘅時候，就好似跑馬拉松跑到就死，突然有架冷氣巴出現，你上唔上？好多人會上，但我會繼續堅持。而依家就係飲完杯水繼續跑，既然俾多次你做選擇都仍然咁行，就再無空間俾你後悔，所以我會比喺香港時意志更堅定」。
「如果第日有人問起我做盛行？我會話我係農業師」，「田中之子」黃如榮如是說。
Comments are closed.