「有時會諗，如果我哋無過嚟，今時今日會喺邊做過啲咩嘢？」閒時喜歡看擠粉刺暗瘡的影片，酒米膿頭從毛孔爆破出來，這「怪癖」對 Y 是活在苛法下，獲得舒坦的一刻。經歷這些年的不公義，Y 以為她可掙扎多一會兒，閉上眼繼續賺錢，忍氣吞聲地過活，「但我唔可以將自己放最高，小朋友先係最緊要。」為了唯一的女兒，Y 與丈夫放棄過百萬元的年收入勇闖英國，「都係諗住打份兼職。有手有腳點都生活到。」
放手一搏，才發現這是實現小小夢想的開始——將熱愛的採耳由興趣變成正職；打破固有工作室模式，組成流動團走訪各大城市上門採耳。昔日在港追業績搵大錢，原來不及幫客人挖出一塊提子乾大小的耳結石來得滿足，「人生真係 never say never。」
「一粒係油性耳，另一粒係乾性耳嘅。」Y 捧著「新鮮採摘」的耳結石，有點興奮地說著。「以前細個係阿媽幫我撩（耳）嘅，之後變咗我幫佢撩。而我阿媽分泌比較多，所以我係好 enjoy 每一次幫佢撩耳仔。 其實都好多謝阿媽，喺呢件事上畀咗大大滿足感我，孝感動天啊，哈哈。」自言可看足三小時擠暗瘡片的 Y，受到媽媽「薰陶」後，決定修讀專業採耳課程並找師傅學師，去年初更在荔枝角開設小型工作室，一圓「採耳夢」，「真係好治癒。」
「開 studio 都係為興趣。」Y 說一直也有移民念頭，尤其在 2019 年及之後發生很多不公義的事，「已經唔再信嗰班人係有良心。同埋《國安法》真係乜嘢都講唔到。」她說，原本計劃在港努力儲多幾年錢，待女兒升小學時才離開，更研究過哪些國家不用坐「移民監」，「或者係唔使個人真係過去但幾年後又拎到佢哋國籍。嗰時以為可以掙扎多陣⋯⋯」
誰料同一時間 BN(O) 簽證出台，與丈夫商討後，覺得要把握機會提早離開，「都有少少唔甘心，大半年都儲咗啲熟客。但我當時覺得（工作室）都係啱啱開始啫。如果反正都遲早可能要抆（結業），不如而家呢個 moment 抆，長痛不如短痛。同埋最緊要都係個小朋友，唔可以淨係諗自己。」
不出一年，她與丈夫前後腳在去年 9 月和 12 月赴英。「始終要走，感覺要丟低好多嘢。」要放棄的不只傾盡心血的工作室，還有她在跨國公司銷售部經理級的穩定正職、與丈夫合共過百萬港元的年收入，「就係靠個女畀勇氣我哋。本是無一物，有手有腳點都養活到自己。」
她說，擔心英國人不認識採耳，加上再沒有傭人，原本只計劃找份普通兼職，方便湊女和料理家務，「技痕時至多幫佢（丈夫）採。」但丈夫一直鼓勵她將興趣和手藝轉成職業，至今年 1 月她就開始為住附近的港人採耳，「因為屋企好多紙箱未拆，所以先上門幫人採。」
而這些上門採耳經驗，打破以前固有的工作室或舖頭模式。她說，考慮過在英國開舖採耳，但成本較高，加上港人分散英國多處，開舖變相局限客源和靈活性。於是決定在網上「開團」，召集不同城市的港人預約，儲夠 3 至 5 名客人即成團，她與丈夫帶同按摩床、椅子、香薰和各式採耳工具，親自到不同的城市租用工作室或上門採耳。「流動採耳團」推出至今反應不錯，兩夫婦已走訪倫敦、曼城、拉夫堡、布里斯托和劍橋等城市，「喺啲 facebook group 出 post 話可以上門採耳，點知都幾多人留言話有興趣」。
她指，不少人喜歡洗澡後用棉花棒放入耳道「索水」，卻把油脂、污垢和死皮等推入耳道，久而久之積成耳結石，導致耳塞、耳嗚等不適。如果要由英國醫生簡單清理耳道或需每次付費約 60 至 90 英鎊，「亦稱唔上係採耳」，認為自己收費較相宜，加上提供上門服務，成為她的創業優勢，「有啲可能係一個家庭，阿女做完就媽媽，之後爸爸又想試吓咁。如果可以喺客人屋企做，就可能可以全部都 cover 晒，（流動團）就係想試呢樣嘢。」
「其實將耳仔交畀一個陌生人係需要好大嘅勇氣。耳仔係好敏感同私密嘅位置嚟，佢願意畀你睇佢嘅耳仔，係好講求信任。」她指，在港與客人聊天，話題因政治氣氛而變得小心翼翼，決定赴英後也不敢「周圍講」。現時可花更多時間和客人交流，甚至不介意談及政治，「以前喺香港唔會問客人『底細』，頂多問食咗飯未。但呢度係大家都好願意分享資訊，因為大家都唔係過咗嚟好耐，去邊度食飯、買車等課題都傾到。遇到好多都係同聲同氣，講嘢唔使就住就住。個戒心係少咗好多。」
雖然每次出團長途跋涉，採耳收入更不及她香港月薪的一半，但她認為比以前在港搵錢更快樂，更滿足，「識到唔同地方住嘅香港人，可以直接咁幫到佢哋解決耳仔嘅唔舒服，我哋又可以去唔同嘅城市周圍行，寓工作予娛樂。以前係搵得多錢，但返全職好似困住咗喺一個窿窿度咁，入面好多漩渦自己會轉咗落去，工作壓力好大，賺完啲錢都好愁咁。反而而家跳出嚟，仲輕鬆咗，可以自己控制時間，慢慢諗下個步伐可以點行。」
「有時會諗，如果我哋無過嚟，今時今日會喺邊做過啲咩嘢？人生真係 never say never。」
