一杯「靚」嘅絲襪奶茶，不但講究茶香奶滑味濃，更要令人「飲過返尋味」。「有老華僑嚟試我杯奶茶，話勾起佢幾十年來嘅回憶」，奶茶師傅Eric去年底移民英國，隨後創立自家港式奶茶品牌，煲茶沖茶包裝運輸一腳踢。近月更和鄰居港人Howard合作，引入香港茶餐廳所用的奶茶茶葉，首張單就是來自港人在英國開設的茶餐廳。他亦會傳授沖奶茶技術，盼把香港奶茶在英國遍地開花，「係一種執着，我要港式奶茶就係做返香港人嘅味道。」
奶茶師傅Eric在港從事批發奶茶茶葉予茶餐廳和連鎖店的工作，自十多年前起學沖港式奶茶。他說，在世界各種奶茶中，港式奶茶需要最高的技術去沖泡，每步也是學問。除了溫度和時間的配合，茶葉也要溝過再慢慢煲出茶香，才沖到港式奶茶獨有濃香，「點解我要堅持港式奶茶？因為香港獨有、無人唔識」。
然而香港政局急劇轉變，考慮到女兒的成長，Eric一家三口去年平安夜取得LOTR落腳倫敦。他說因讀書不多，英語一般，所以帶同沖奶茶的爐餅、茶煲等架生，決定移英後創業：並趁到埗後的封城期間，了解英國創立飲品品牌所需的各種資料，每步也是摸住石頭過河，就連奶茶所用的奶，他亦花數月時間親嘗挑選，確保能做出香港味道的奶茶，「嚟到呢到其實好需要人幫忙，我就叻喺出品，但其他嘢我唔識，例如marketing、送貨搵司機，唔知喺邊到搵」。
今年中他曾與另外兩名港人合作在英推出港式樽仔奶茶品牌，不久因理念不同而拆夥，「但呢個係我老本行，亦都係我唯一出路」，故Eric重整後捲土重來，9月獨自創立「Trini」港式奶茶品牌，每一樽奶茶堅持以香港手法和沿用的港式奶茶茶葉沖泡，「Trini係我個女個名，無記錯係西班牙名，中文譯返就係三為一體咁解，代表我哋一家三口；另外都代表到港式奶茶香、滑、濃呢三個元素。」
由於品牌主打新鮮即沖的港式奶茶，Eric每朝開始煲茶沖茶，然後把奶茶入樽和量度容量、貼品牌貼紙、甚至運輸也要一腳踢，「超市就係營業時間俾到貨佢，雖然無話限時，但都好睇時間，朝早同放工時間會塞車要避」，有時視乎去貨情況，可能要由朝做到深夜。加上奶茶有奶易變質，沖好奶茶後要攤凍再放入雪櫃，「攤凍得太耐會有機會滋生細菌，我就要掌握呢個時間。所有嘢好細緻，唔係煲完就算。」
現時「Trini」在倫敦包括H-MART在內的兩間超市上架，他說，因舊品牌曾在H-MART上市，新品牌再上架時就變相容易。幸好新品牌反應理想，更獲英國人讚好，「揀H-MART主要係因為近（所居地點），同埋係偏向新式嘅超市，較容易接觸本地人或外國人。但我兩班人都做，一班由細飲到大，另一班完全未飲過嘅。當然香港人嘴刁，食得最多美食，如果你令香港人都覺得好飲，你已經過咗第一關。」
他又說，特意選用可100％回收、英國製造的膠樽仔，雖然成本較高但相對環保。不過由於新鮮樽裝奶茶必須冷藏，使其成為一個局限，若要拓展至倫敦以外的地點，整個物流鍊也要雪櫃付運，成本貴得多，變質風險也較高；若把奶茶急凍結冰，客人解凍後所飲到的品質就會有所不同。正因如此，反而開拓了奶茶茶葉的生意。
Eric在落腳的公寓，認識了同樣在去年底移英的港人Howard。Howard在港從事投資，早在2014年普選無望起，已萌生移民念頭，「嗰一刻開始香港已經返唔到轉頭。」經歷2019年後，香港社會再次變樣，「我哋成長時擁抱嗰種價值同環境，我哋細個時接受過幾好嘅教育，全部都無曬。一個時代嘅終結。香港係我哋鄉下，但（我們）彷如一個異鄉人。」
Howard說，樽裝奶茶品牌全是Eric心血，故自己未有參與，但認為茶葉批發的市場更大更廣，具潛力作長遠發展，於是與Eric合作創立「Hong Kong Tea Co」茶葉品牌，引入香港茶餐廳沿用、混合五至六種斯里蘭卡茶葉的港式奶茶茶葉，「呢邊好多老華僑或者原本喺度嘅茶餐廳，好多時為慳皮，就去超市買英國嗰啲茶葉，但就唔係嗰個味囉。」
Howard指，茶葉品牌同時有批發予英國的港式茶記及零售的家用裝，為確保有足夠貨源供應，就要先入一大批貨，亦同時要計好貨量和船期。他說，不便透露創業成本，但認為入貨也要靠師傅經驗，「香港好多嘅奶茶都撈啲好渣嘅茶落去，你識唔識分？呢啲係知識同經驗，係無得計。」
Eric則說，樽裝奶茶主攻倫敦市場，但茶葉批發可打開缺口，讓更遠的人嚐試到港式奶茶，甚至幫到想開茶餐廳的人創業，「英國咁大，好多地方仲可以有港式奶茶，咁我哋就用茶葉去sell出去。可能岩岩過嚟嘅香港人想開檔嘅，自己有一兩味撚手嘅嘢，就係差一杯奶茶檸茶。我哋就喺水吧呢邊幫到手。俾到多個選擇佢哋，開舖創業個決心會更大。」
二人的茶葉品牌首張訂單，正是來自移英港人在伯明翰新開的茶餐廳，甚至為該名客人搜羅煲茶專用的爐餅和爐架等，「我哋特登揸車上去，來回5個鐘，其實都係去傾吓計。好多香港嘅朋友知道附近開咗茶餐廳，排晒隊幫襯，好感動」，Eric說，「凝聚咗一班人喺一個地方，喺香港茶餐廳打躉，我哋希望每一個地方都做到。互相幫助我覺得好緊要，尤其嚟到陌生嘅地方。」
Howard補充，如有需要亦會教授沖茶技術，不過亦有客人本身就在港開茶餐廳，該老闆娘和三個伙記都先後移英，想埋班開檔，奈何周圍找不到茶葉，「我哋寄咗包家用裝茶葉俾佢，幫到手好開心。我哋想周圍都買到，周圍都飲到嗰個味道」。
「無理由香港人過到嚟唔帶返啲香港嘢， 呢個就係一種執着，叫得港式奶茶就要做返香港人嘅味道。」Eric稱，下一步希望找更大的地方生產奶茶，茶葉的供應可做到全英遍地開花，「一定有困難㗎啦，但都要朝住個目標去做，即係等於點解我要堅持做落去呢，無非想帶出港式奶茶背後嘅文化俾英國人知道。」
他們說，若要在英創業，首要放下昔日在港只顧發達的心態。Eric說，有次在活動免費派奶茶，有幾個移英數十載的老華僑排隊，「佢哋話勾返起自己幾十年來嘅回憶，雖然好耐都無返香港， 但竟然仲記得嗰個味道。佢哋想攞返嗰個感覺，呢樣嘢係用錢買唔到。」
「我覺得個意義就係，希望周圍都可以飲到正宗港式奶茶味道， 即係唔係大乜樂嗰種求求其其嘅、唔係英國超市是但撈出嚟扮奶茶嗰啲，飲嘅真係香港味道。我希望啲人飲一啖奶茶或者檸茶，會記得返嗰個時代嘅香港」，Howard如是說。
