「嚟到英國強烈建議唔好再飲涼茶！」三餐離不開煎炸嘢，天氣乍暖還寒，初來報到的港人想在英國找中醫如何是好？在英執業的香港中醫師林逸瑜說，英國的中醫良莠淆雜，因英國沒有統一的中醫註冊制度，甚至有不良商人打著中醫幌子暗地販賣色情，損害專業中醫在英名聲。
近日設立網站整理在英香港中醫名單的她稱，冀為移英的香港中醫提供資歷認證，同時助港人尋找鄰近中醫，「如果呢班香港醫師能夠重建香港人、甚至英國同其他人對中醫嘅信心，令到呢行再有返多啲人信，係我自己一個好私心嘅希望」。
林逸瑜2016年偕丈夫移民英國，中大畢業的她是香港註冊中醫師，赴英後繼續執業。她表示，英國政府2000年前開放工作簽證予中醫師，大批來自內地及香港的中醫赴英，「嗰時中醫喺英國係流行過一排」，但官方對申請人學歷及資歷認證較鬆散。至2012年英政府停止批出中醫師的工作簽證，但一直未有為中醫成立統一的考牌或註冊制度，令中醫這行業在英國變得龍蛇混雜。
她指，現時沒有經驗或學歷的人也可以「中醫」身份在英國執業，毋需持有中醫特許註冊，「某啲council只要你喺街度立個牌話我係中醫就可以開」，她更見過一些在內地只讀過針灸和推拿課程的中醫，在英國幫人開藥方。甚至有不良商人打著中醫或中式按摩幌子，搞色情生意，拖累整個行業在英國的印象，「呢啲係害群之馬」。
及後有業內人士成立中醫專業團體，在英中醫要交不同的文件，供團體審查其學歷和資歷，甚至參加考試才可成為會員。她說，病人可透過中醫專業團體的會員資格，去確定該名英國中醫是否「真醫師」；部分區議會可能會要求擬開業的中醫診所遞交會籍證明，才批准開診。現時英國主要有幾個較大的中醫專業團體，如ATCM 英國中醫藥學會，但始終沒有官方般的約束力，是否加入專業團體只屬自願性質，而且上門行醫在英也很普遍，亦成另一個灰色地帶。
她指，中醫在香港屬醫療體系的一部分，「好多時保險包埋嘅，病人係唔需要付額外嘅錢嚟睇症」。換言之，中醫在香港客源較為穩定。相反英國中醫不在醫療體系內，大多中醫診所均屬私營，病人要自行付費，NHS即使有針灸，免費服務非常有限，或需另外收費。一方面英國中醫的醫術要具一定水平，才可令病人願意來睇症；另一方面客源卻較不穩定，「商業味」自然較強，「香港有啲中醫診所比較基層，收得好平、多啲嚟密啲手咁。但喺英國因為病人真係少啲，所以有時收得好貴，或者個別老闆希望除咗基本嘅藥外，仲想你（中醫）兼sell啲健康產品」。她指，視乎藥材和病情等，英國中醫比香港流動醫療車的收費貴大約兩至三倍。
她說，英國的中藥主要是入口貨，價錢較香港貴幾倍，部分蟲類或礦物類藥較難購入，質素也可能未必有香港般高。加上英國對中成藥有嚴格規管，中醫在用藥亦有較多限制，故英國中醫會較著重以針灸或推拿進行治療，效果亦獲外國人認受，例如NHS也有針灸服務，但主要是他們的物理治療師等兼讀針灸課程後進行治療，不像香港中醫般要讀全科。
林稱，自己在英的病人除港人和中國人，更多是奇難雜症，「如果係外國人嚟睇，即係佢哋已經睇西醫睇到無晒辦法。可能係長期牛皮癬、濕疹；或者係啲奇怪嘅腸胃疾病、一啲莫名奇妙嘅痛症，例如頭痛痛到照埋MRI都搵唔到原因。」但最深刻是某印度人中風後無法行路，經針灸後逐漸可慢慢站起，「英國對中風後嘅病人支援較少。而針灸對中風嘅效果幾顯著，見到個病人可以行到幾步，覺得真係幫到人，係睇得到中醫個價值喺度。」
她表示，數年前她加入英國一個中醫專業團體時，會員裡只有她來自香港。但隨移民潮出現，不少中醫朋友向她查詢英國執業的事，「我嚟嗰陣開展得好辛苦，兜咗好遠嘅路。唔想其他人重蹈覆轍」，她遂開設facebook私人群組為行內人提供資訊。不料還有很多移民港人向她查詢各式各樣的睇中醫疑問，「同香港好唔同嘅係，有個香港人被介紹咗嚟我度，但我住倫敦、佢住曼城，真係愛莫能助。」
於是她決定建立網站，組織來自香港的中醫所在地點及聯絡，至今集合了至少10名醫師的資料，有利行家應診同時方便病人求醫，一石二鳥。而她會仿效中醫團體般，審查有關中醫是否已在香港註冊，「學歷我查唔到，但如你喺香港註冊到嘅話，就最少證明到你係一個香港註冊嘅醫師」。她說，香港與廣東等地的中醫多數來自南方，港人「睇慣」南方的醫師，來到英國的中醫南北混雜，「突然換咗一個北京讀書嘅醫師俾你去睇，你未必夾到。」
「英國好大，香港人會係我哋一個好重要嘅客源。但令我更加覺得有希望嘅，係呢一班香港中醫師嚟咗。」她說，自當年英政府停批中醫工作簽證，在英中醫大部分已年過半百，像她較年輕的中醫已是斷層；加上不法商人令行業名聲受損，「如果呢班香港醫師可以重建返，唔止係香港人，而係英國、其他人對於中醫嘅信心，令到呢個行業可以好似以前咁有返多啲人信，呢個係我自己一個好私心嘅希望。」
林逸瑜中醫設立的網站：www.tcmlink.co.uk
