香港人閒時喜愛飲杯涼茶下火，不過移民英國的香港註冊中醫林逸瑜卻為此「大聲疾呼」，強調港人移英後不宜再飲羅漢果、廿四味、夏枯草和五花茶等涼茶，「唔可以用香港嗰套，就算只係湯水都直接搬過嚟，係唔work嘅」。
「每次行中超見到啲人買涼茶就想阻止」，她解釋，中醫講求天時地利人和，「因為涼茶係涼，喺香港適合飲，原因係香港屬熱帶地區，你先要清熱解毒。但你而家喺一個天氣根本唔熱嘅地方，你何來清熱解毒呢？」
她指，在英國適合飲涼茶的，體質都要「好熱」，「而真係好熱體質嘅人無想像中咁多。可能十個人只得兩個人適合喺英國飲涼茶。就算你喺香港好熱氣，你嚟到英國都唔一定會好熱氣」，否則只會弄巧反拙，令身體變差。此外，像是安宮牛黃丸等產品不是用作保健，港人不應「亂食」。
她表示，香港人的腸胃較易「生濕」，來到不時下雨的英國，「你可以祛濕，但你首先要確定自己有濕。清熱祛濕成日一齊講，但清熱其實會傷到你個正氣，咁到底你係因為正氣唔夠所以有虛火，定係因為你真係好熱氣？有濕同熱氣係兩件事嚟嘅。」她指，英國天氣寒冷，宜根據體質，多吃溫補的湯水和食材，如北芪、白朮、黨參和杞子等。若有身體不適或對自己體質有疑問，應及早求醫。
