當年搵工嚐盡苦頭　落地生根後幫港人定居　溫哥華街坊會 Henry：好開心有得幫自己人

由一個熟悉的成長地移民到新地方，要重新適應也許不容易。成立溫哥華街坊會協助新移民港人定居，創辦人 Henry 說自己當年 38 歲為愛移加，「大半世人同事都喺香港，寫小說、搞 LGBT 運動，搞咁多嘢忽然話走，係有唔捨得同好唔踏實」。他與丈夫 Guy 兩年多前從其他城市移居到溫哥華，「我都算係呢度新移民，想識多啲朋友」，因為對「香港」有情，於是聚集了一班志同道合的新舊溫哥華街坊互助。

溫哥華街坊會在 2020 年 11 月成立，名字參考灣仔區街坊福利會，希望街坊間建立互助鄰里關係，承傳香港文化。現時其社交媒體 Facebook 專頁有逾 3,900 人讚好，聊天軟件 Discord 有逾 1,800 人加入。Henry 說，街坊會成立是順應香港移民潮，「當你開始聚咗班人，然後又有新嘅香港人嚟到，咁佢哋開始問問題，舊嘅街坊又會答佢問題，個互動就係慢慢咁形成咗」。

溫哥華街坊會在聊天軟件 Discord 設立平台，讓街坊們參與不同活動和互相幫助。

新移民最常問題離不開衣食住行，搵屋、搵工。Guy 說，新移民對新環境有很多不認識，即使是買樓、報稅程序亦不清楚，因此初期有很多人問有關問題。後來認識一些谷友是在地組織的成員，便邀請他們進行網上講座解答港人移民及定居問題。Henry 則笑說，「定居耐啲嘅人，就開始問邊度有好餐廳、抵玩，邊度有好嘅中式嘢食、有推車仔酒樓，或者係 Costco 有咩抵」。

溫哥華街坊會去年舉辦周年慶，參加人數反應熱烈，超出 Henry 和 Guy 預計。（圖片由溫哥華街坊會提供）

Henry 提到自己當年成為新移民，搵工經歷令他吃了苦頭，「香港人係會蝦返香港人，香港華人老闆好刻薄，條件好差，差唔多係搵你笨」。因為這些經歷，更令他想改變風氣﹐「要幫返自己人，睇下啲 Jewish（猶太人）幾團結，個個請返自己人，晉升返自己人，有少少似黃色經濟圈」。自街坊會成立後，「好開心依家有得幫自己人，上次開 seminar 搵工，有酒店業話請 trainee，你哋邊個有興趣嚟搵我哋啦，變咗係一個好好嘅改變」。

溫哥華街坊會口號是「傳承、接納、共融」，Guy 說街坊會與其他香港人組織不同之處，著重新來港人融入當地社區。以原住民議題為例，「有時活動開始之前，我哋係會做土地宣言」﹐解釋大家能在這片國土享受自由自在的生活，要感謝原先在這片土地的原住民。Henry 亦希望來加港人可以認識多點加拿大政治，「香港人對加拿大政治冇認識或唔深，像每次（候選人）大選講嘅說話，好似 BB 班咁話要 all in 某個黨或者嗰個人，呢度唔係好 work⋯⋯可能個黨講唔係（舔共），但入面個個奶（舔）到七彩」。

懂流利法語的 Guy 每周會為有興趣的義工們義教法語，Guy 說「學法文都係融入加拿大之一」。（張凡攝）

街坊會聚集了一群在溫哥華的香港人，部份會員更成為義工。訪問當日，除了 Henry 和 Guy，還有三名義工。他們各自因不同的際遇離開香港，移居他鄉生活，但因為對香港一份情意結，令他們不求回報想幫返香港人。

「眼見香港人流散世界各地，覺得好悲哀」Marco 說，他十多年前完成香港會考後，隻身到美國西雅圖生活了 12 年，後因工作機遇移民到溫哥華。「依家有 Stream A、Stream B 係容易好多，我開頭係拎工作假期簽證，又攞過工作簽證，之後 Express Entry 要計分，試過為咗拎高分，考 IELTS 考 8 次為咗拎高分，任何嘢都經歷過」。他希望用自身經歷去幫助香港人，盡快融入社區，「移民係唔容易嘅，真係好難，因為要選擇離開熟悉嘅地方，去一個陌生嘅地方」。

14 歲移民溫哥華的 Stacey 自小受到「黃到發金」的港爸影響，對香港有一種感情。「因為喺 2019 年反送中運動，見到香港人咁嘅情況都好心痛，都想做返啲嘢幫香港人」。她曾經見過一些新移民港人來到加國，即使有多年工作經驗、具碩士學歷，但都找不到理想工作，「嚟到呢度做侍應或洗碗，覺得好浪費人才」，因此她會協助港人練習見工面試。

Stacey 提到，港人在加見工面試失敗原因除了英文水平外，這裏答問題需要提供一些例子，不應空談概念，認為是文化的差異。（圖片由溫哥華街坊會提供）

Stacey 參與最多活動協助港人搵工見工，訓練他們英文會話，讓他們至少面試可以對答到。（圖片由溫哥華街坊會提供）

來加半年的 Sherry 則希望傳承香港文化，例如廣東話，「其實唔想話大家嚟到，經過呢代之後就失去」。她說自己也是新移民，「經過呢大半年，有啲嘢我都撞過板，有啲經驗可以分享返出去，等之後嚟嘅街坊，唔洗行咁多冤枉路」。

Sherry 去年來加讀書，希望認識更多香港人，建立自己圈子，所以參加了糖水會，同時報名做義工，現時在街坊會中負責社交媒體帖文、活動主持等。（圖片由溫哥華街坊會提供）

Henry 談到街坊會成員中，約有三至四成在溫哥華居住了 20 至 30 年，而 Discord 內設有「地膽」角色予他們。他引述曾有「地膽」義工說，「20、30 年老華僑都 settle down 曬，其實完全冇諗住幫人，4、5 年前如果我話想出嚟識朋友，應該冇人睬我。但因為有街坊會呢件事，令到有個平台畀到大家」。Henry 認為，這些老街坊已經很長時間沒有認識新朋友，而街坊會之所以得以發展，是有幸凝聚了一班老街坊，多得他們付出真心、時間和知識去幫忙。

隨著愈來愈多港人移民到溫哥華，除了衣食住行問題，Henry 和 Guy 都留意到有些新移民出現心理問題。Henry 提到，舉辦周年晚會時，在場有從事輔導工作的街坊出席，發現同枱有參加者可能曾經是手足或參與反送中運動，個人情緒仍是很差，席間甚至有人流下淚來。

Guy 接着說，「有啲人有好多唔開心，唔想拎出嚟講，但暗地裡會同其他街坊或搞手私底下傾，甚至約見面食飯」；亦有些人單純入來認識朋友，對心靈上有很重要的幫助﹐「有啲人其實不愁衣食，但無朋友，生活好難過」。Marco 稱，新移民內心可能有很多掙扎，「香港人怕醜，驚主動做第一個出聲」，但街坊會就提供一個平台幫助他們，尤其心靈上幫助好重要。Guy 笑說：「有啲真係一個朋友都冇，入到嚟有成班人講 How can I help you（有甚麼可以幫你？），咁你都幾開心㗎喎」。

至於街坊會未來計劃，Henry 說會繼續以協助新移民港人定居為主，亦會與不同在地組織合作，「街坊會唔需要大，係成個社群，最重要我哋令到啲人埋到堆」，希望有更多新人加入，可以交棒年青人傳承下去。