同文博客
英國親切嘅地方，係就算去超市買嘢、見到鄰居或去餐廳食嘢，都有可能會同人閒聊幾句。
星期日我個仔學打籃球時，我喺對面餐廳做住嘢等佢，隔離枱坐咗 3 個婆婆。食食下嘢，其中一個婆婆電話響，然後聽到佢講 video call，應該係同佢家人同孫女傾計。我諗起我個仔 Checkin同佢婆婆，不禁自己都微笑。
之後個仔學完籃球，係餐廳食少少嘢。嗰3個婆婆望住Checkin，讚佢好乖。我話頭先佢哋同家人講 video call 時令我諗起我媽咪，我媽咪成日都同Checkin講成個鐘電話。婆婆話，佢哋都成日講 video call，但其實家人都係住附近，宜家講 video call 唔洗錢好方便。
婆婆然後問我家人係邊，我話全部都係香港。
估唔到，跟住佢哋會咁大反應。婆婆叫我帶埋屋企人嚟英國啦，又問我有冇兄弟姊妹、父母幾多歲等，話一家人好重要，叫我快啲叫佢哋過嚟啦。
我話我父母英文唔好，佢哋啲朋友又係香港，嚟到會唔適應，所以想留係香港。3個婆婆就不約而同咁話，我英文咁好，叫我照顧佢哋就得啦！佢哋一定要快啲離開呀！其實講到呢到，我都已經好感動。
意想不到佢哋講咗對香港嘅睇法，然後就話：「有機會就快啲離開喇！」
我無提起任何有關香港嘅事情之下，聽到呢一番說話，其實又感動又心痛。
婆婆話佢哋有留意有關香港嘅新聞，佢哋睇住一切嘅改變，婆婆更加可以講出一啲事件。話我父母好後生，有我照顧應該好快適應，再強調我要帶埋兄弟姊妹，要一家人一齊嚟英國呀！
我話多謝佢哋，我會好好考慮佢哋嘅建議。婆婆即刻話，唔好考慮啦，唔拖得嫁！
我笑笑話好啦，會同佢哋傾下。婆婆又好可愛咁答話，唔係傾呀！同佢哋講已經買咗單程機票，幾時上機就得喇！
佢哋離開餐廳時，再同我好真誠咁講：「好多時老人家都唔會理解個重要性，佢哋一定會話唔好，你要替佢哋揸主意呀！」
同3個婆婆講再見，望住佢哋背影有一絲絲感動。3 個不相識嘅婆婆，佢哋一番關切嘅說話，都真係令我掛住香港嘅家人。
離唔離開，係個人嘅決定，亦無話對錯。我家人亦好清晰自己嘅選擇，大家亦好明白移民並不是一件簡單嘅事。每個地方都有適合一個人同令人喜愛嘅原因，而每個地方都有令人快樂嘅事情。但願大家都快樂平安健康就好了。
*本文只是分享 3 位婆婆的說話和個人見解。
#3位婆婆講咗啲咩？
#大家在心中啦
#其實佢哋講時仲要好認真
#各人有取捨
#而家人都為大家嘅選擇而替對方高興先係重點
#真係一個好窩心嘅星期日
