話說 9 號嗰日，我幢大廈要強檢。嗰排係最 strict 嘅時候，大廈有一單確診都要全幢居民去強檢，然後每次要排幾個鐘隊嗰種。
我細佬不幸地揀咗一個「聽講噚日無咩人」嘅流動站去排，一排就係 6 個鐘。我就好彩啲，book 到放工去另一區嘅檢測站。
呢個只係前奏。
12 號嗰日，原本我哋要去做第 2 次檢測。點知細佬一早就收到 SMS，話佢 9 號嗰次係初步陽性。我哋勁驚，喺屋企都即刻戴晒口罩。其實我哋好費解，因為佢明明係「隱青」，全家最少出門就係佢。
嗰日我照出去做第二次強檢，兼補充家中物資，預備大家分別畀人送去檢疫 14 日，之後再幫細佬攞深喉唾液檢測樽去交。
嗰陣係檢疫設施爆煲嘅開始，所以我哋只可以喺屋企展開漫長嘅等待。細佬留喺自己間房，我同爸爸媽媽就喺出面生活，除咗食飯、沖涼，我哋 24 小時都戴口罩，瞓覺都唔例外，又狂消毒家居。我哋分開食飯，夾好餸菜就攞畀細佬。細佬自己有間房，算係幸運，但係我間房同佢間房有一個相通嘅小氣窗，所以我自 12 號起就搬咗出嚟做廳長。
最初我哋好 stressed，因為細佬 9 號做檢測，12 號先收到結果，我哋有 3 日都係同食同住。我同爸爸媽媽之後陸續收到第一次檢測結果，都係陰性，我哋先定返少少。我同爸爸媽媽後來做咗幾次撩鼻都係陰性，細佬兩次深喉唾液檢測都係陰性。期間大家都無病徵，無唔舒服。
細佬收到初步陽性個 SMS 之後，只係第三日有衞生署人員打電話嚟對身分證同地址，然後就沒有然後了。係咪佢之後個深喉唾液檢測陰性，所以衞生署無再聯絡我哋？我估唔係，應該係佢哋做唔切，又無檢疫設施，佢哋喺疫情記者會都講明 priority 留俾長者小童同重症。我同爸爸媽媽連密切接觸者嘅檢疫令都無收過，係自律留喺屋企㗎咋。
近呢幾日，政府話送唔切檢疫嗰啲個案，自己留家 14 日，快速檢測係陰性，就可以自行放監。細佬留家檢疫過咗第 14 日，就做快速測試，係陰性，所以佢自我解禁咗。
細佬喜歡食嘢，我怕佢食唔慣「糟糕灣」膳食，所以準備畀佢嘅「入營物資」有埋出前一丁。而家唔使入去，都係不幸中之大幸嘅。
而家我哋唯一嘅問題係：細佬係咪真係感染過 COVID-19？
疫苗通行證啱啱開始推行，但細佬一針都未打。佢原本 book 咗 2 月底去打第一針，但如果佢中咗，係唔可以咁快打 vaccine，署衞生防護中心建議康復者出院後最少 90 日後先接種第一劑復必泰，如果打科興更加要等 180 日。
其實細佬唔多想打針，所以無得打本來不是太大問題，但佢個通行證豁免就唔知點搞。如果係感染過，邊個去證明？如果無中過，又邊個證明佢可以打針？而家完全係個無頭冤案。
細佬夾喺所有政策嘅夾縫之中。但佢個情況都唔算好特殊，近兩個星期好多呢啲幽靈個案，初步確診、無病徵，唔知係咪真係確診，但醫院爆廠，去唔到驗。我朋友話聽到早幾日 430 記者會有人問類似個案點樣證明嘅問題，但啲官係答唔到嘅。
呢排我一邊照常 work from home，一邊頻撲搞抗疫，仲要安撫吓父母。如果要用 4 個字嚟形容細佬檢疫嘅呢兩星期，我會用「度日如年」。
