我同呀媽都冇打針。我一路都覺得，打咗都好似係會中，推動唔到我去打；喺呢個疫情入面生活落去，一定仲有辦法嘅。只不過而家係個政策令你冇選擇自由。林鄭都講到出面：「係㗎喇，我就係要令冇打針嘅人生活唔方便。」咁樣叫誘因去逼人打針，我覺得極之荒謬。
其中一個辦法，就係做好自己囉，畢竟之前日日出去做嘢、返工、見朋友，社交最多嗰個就係我，有咩事，都係我惹返屋企畀呀媽。所以，新年期間去完朋友屋企，後來佢嗰棟有人中咗，我就算冇收到強檢，都即刻去預約檢測。
平時啲防疫都做到慣晒手勢。返工，袋都未擺低就洗咗手先，一得閒就抹下張枱、抹下 keyboard ，收工又會再執返好張枱，噴防毒噴霧，日日都做。屋企又恆常清潔，定時喺渠口倒水。唔打針唔代表唔 care 個疫症，只係選擇嘅問題。
嗰日返緊工，睇到消息話好快會搞疫苗通行證，我即刻覺得好嬲。我自己就冇乜所謂，最主要係緊張呀媽。
佢 70 歲，有少少長期病，定期要去醫院檢查，佢覺得枝針打落去就一世，抽唔返出嚟，如果有得揀，唔想 take 呢個 risk。其實自從教會轉咗用 zoom 做禮拜，佢已經好少動態活動，八、九成時間都喺屋企睇電視、睇書，唯一出街嘅機會就係行下街市、超市，買下補給品。而家連呢個機會都抹煞埋，變咗 100% 時間要困喺屋企。
呀媽不嬲都唔會特別緊張、情緒化，平時都係收收埋埋。所以嗰日我一返到去，就搶先做咗安撫角色，同佢講：「唔係嘅，你仲有選擇嘅。」去唔到超級市場都唔緊要，仲可以網購㗎嘛。我同佢講：可能你會唔習慣，趁而家未到 2 月尾，我哋就用兩個禮拜試下，睇下你 O 唔 OK 啦，如果唔得先再搵其他方法。
我又有諗過，租一格屋苑樓下嘅苗圃仔，等我自己落去種啲嘢先，再叫呀媽幫我打理下，至少佢有個落樓嘅機會同藉口，不過而家仲未排到。
至於我自己，我本來就冇擔心過疫苗通行證。lunch 冇得同同事一齊堂食，我咪準備定啲外賣盒，買外賣返 office 食囉；髮廊就算開返我都冇得剪頭髮，我咪搵我個髮型師朋友，上佢屋企剪囉；唔行得商場，對我好大影響咩？我覺得 OK 呀，唔行又有乜所謂。我一路覺得一定有第二條路嘅。
點知，上個禮拜就收到公司通知，要我打咗針先可以返工。望住個 message，我成個人即刻變成灰色。到最後，睇怕我都係被逼要揀份工。自己嘅選擇，自己都捍衛唔到，被逼嘅感覺真係唔好受。
