記協將於 4 月 23 日召開會員大會，就應否修改會章以配合未來方向諮詢會員，將商討包括會章第 17.1 及 17.2 條有關解散門檻及剩餘資產分配安排。記協主席陳朗昇回應《同文》查詢時，強調召開會員大會是因應香港傳媒人及傳媒機構正面對的困難，記協希望聽取會員的意見，並非為解散作準備，如無意外，記協即將選出新一屆執委會。
記協正諮詢會員是否同意修改會章第 17 條「本會之解散」部份，包括第 17.1 條「本會必須有全體有表決權會員不少於六份之五以不記名投票表決同意方得解散」及第 17.2 條「遇本會解散時，本會所有經清還債項後的剩餘資產將平均分給所有有表決權會員」，並將於 4 月 23 日在開會員大會上討論。
被問到記協今次召開會員大會是為解散作準備，記協主席陳朗昇否認。他強調，今次大會純粹是想聽取會員意見。「喺呢半年，咁多間傳媒機構有唔同嘅情況，會員一定有佢嘅意見，一定會對記協嘅安危、記協嘅情況有所擔心，我哋聽咗好多人表達呢啲擔心，當然都聽到好多人表達、覺得記協可以嘅話都堅持落去，覺得記協好重要。」陳朗昇續指，面對眾多不同的訊息，執委會要聆聽，會員亦要有機會去表達，「最重要嘅係，會員把握呢個機會去表達大家覺得係點。如果大家都覺得，（今次會員大會）係好機會––係擔心，係咪要思考其他可行性，咁要提出；如果佢話，我唔係嘅，我覺得記協真係好重要，現時亦都好哋哋吖，咁咪繼續囉。」陳朗昇重申，今次會員大會是會員發表意見的機會，如無意外，記協即將要選新一屆執委會，「所有事情都唔係去有啲咩轉變。」
至於記協是否收到消息或壓力而作此安排，陳朗昇回應指，記協面對的壓力、香港現時面對的困難，大家有目共睹，「國安法，同埋不同嘅傳媒人、傳媒機構面對困難嘅時候，記協一定要思考，會員一定有意見。我哋唔可以當啲意見唔喺度㗎嘛，亦都唔可能去到辰時戊時突然之間話，好啦，記協執咗佢啦，咁樣唔得㗎嘛，我一定要問清楚會員，你點睇件事、有咩睇法，我哋總要搵個咁嘅機會。與其閂埋門自己個別去講，不如就喺一個有機會去講嘅地方度去講。」
