【《同文》現正徵集「圍城內的港人」故事】 強檢、圍封、疫苗、限聚、通行證，為求清零，香港政府的抗疫政策一日比一日高壓，甚至已跨越你家大門，無處不管，連圍爐宣洩已成犯罪，港人無不感到窒息。這段時間，你還好嗎？《同文》訪問了數位港人，聆聽他／她在這段日子中，如何面對社會的荒謬，承受著怎樣的情緒。我們歡迎香港讀者 inbox FB、IG，或電郵：pigeon.house@commonshk.com 訴心事，海外港人亦可以同樣聯絡方法分享當初捱過封城、今天與病毒共存的經驗，互勉之。 無論 Mask on 定 Mask off，同文團隊身在海外，繼續跟留港的大家同呼同吸。
（編按：本文「阿爸」的女兒「阿女」的心聲可按下方連結閱讀。）
我哋幢大廈一有確疹個案，我就第一時間報畀公司。公司即刻唔畀我返工，檢測完兩次陰性，都係唔畀返工，仲要經過高層批准先得。
對我嚟講，我上咗岸喇，心態就豁出去，因為我唔憂生活，冇供樓壓力，阿女又出咗身。但我公司有啲同事仲好後生，租緊樓，佢哋好慘、好無奈，返到去公司，個個都冇心機做嘢。今日返返吓工，第二日幢大廈有確診就冇得返。咁都不突止，公司唔畀人工你都得㗎，叫你放無薪假，甚至唔知幾時先再叫你返工。我身邊有幾個同事都係咁。
我今次強檢，都唔知公司會唔會出糧畀我。佢唔會講畀你聽，因為法例冇要求、公司冇政策，完全係取決於個領導人，佢認為有需要就畀。
呢次疫情影響公司都幾犀利，我哋個個員工都要減薪。我以前一個星期返5日半，後來返5日，咁就冇咗半日人工，跟住變咗而家返星期一、三、五咋。我喺維修部，成間廠原本有3個人，而家得我一個，其實公司想連我個部門都cut埋。大佬，如果我真係靠呢份工，邊夠開飯啫？計落一個月返12日，人工係一萬蚊鬆啲咋喎，你話喇？所以有啲同事都辭職，新年過後就唔做。
呢個疫情影響真係好多，經濟又有，家庭又有，出去活動都有。
我太太身體有事，所以冇打針，我哋驚佢出街受感染，我放假咪負責出去買餸、買早餐畀佢哋囉。今日我落去買餸，啲菜成30蚊一斤，商販仲大大聲話：「未來呢3日冇嘢供應㗎喇，你要買就趁早。」 個個都爭住買，好快就冇晒。我買咗一斤菜心，加埋薯仔同蕃茄，65蚊。平時邊使咁貴㗎。唉，總之呢，香港經濟掛帥，如果你冇錢，喺呢個疫情都好難生活。
行去惠康，見到啲人推住一架架車，載滿晒貨，排大隊畀錢，啲貨架就清空晒。我買咗一條嘉頓麵包就算。我都唔係諗住儲糧，因為我覺得香港好富裕，點會餓親人啫？香港人只會食得過籠，餓幾日咪當辟穀，清減吓身體囉。香港人只要冷靜啲，就唔會亂。你個雪櫃有幾大？買埋咁多嘢，擺喺度咪又係吽壞，好似啲菜咁，擺唔到一個禮拜㗎嘛，你最多咪買幾包麥皮擺喺屋企。
以前我細個，六七暴動嗰陣，香港要宵禁。嗰陣有啲人驚，唔出街，困喺屋企冇嘢食，淨係飲水，嗰時啲人捱得嘛。我哋都冇儲糧呢樣嘢，我屋企本身開雜貨鋪，有米、有糧可以賣畀人，只要人哋走嚟拍門，我哋就會賣畀佢。我哋試過成間舖頭啲米、油、鹽、雜糧都賣晒，我哋冇諗住自己儲埋，你要嘅就畀住你先，可以話，有啲捨己為人嘅精神。
細個住過公屋，隔籬左右好互相幫助㗎，冇鹽、冇豉油、冇米會過嚟攞，端午節整返啲粽過嚟畀我哋食，大家都不求回報，鄰里關係好好。好似我太太啱啱嫁畀我嗰陣，有日我返咗工，突然間屋企鹹水個水箱爆咗，佢陀住個肚，覺得好驚，打畀我，但我返唔切嚟。好彩嘅係，佢喺屋企嗌一嗌，對面個鄰居就過嚟幫手，閂咗個鹹水喉。嗱，呢啲就係鄰里關係。
而家應該冇人理你，你爆你事。我有個同事屋企爆咗條鹹水喉，一路由屋浸到出去冷行，由冷行浸到𨋢槽，卒之大廈要佢賠30萬，因為浸壞咗𨋢槽啲control線，short咗，人哋要換cable，咁就30萬。以前邊有可能咁樣發生。
而家好多人都唔知住對面嗰個姓乜，可能住幾咗年，搬走嗰陣都唔知隔籬屋係邊個。大家好少同隔籬屋溝通，冇乜鄰里關係，有時情緒冇得宣洩，冇咗互助，疫情一嚟，孤立無援，精神壓力就特別大。
我哋呢代人，呢啲情況見得多，對疫情處之泰然，煮到嚟就食啦。
