【《同文》現正徵集「圍城內的港人」故事】 強檢、圍封、疫苗、限聚、通行證，為求清零，香港政府的抗疫政策一日比一日高壓，甚至已跨越你家大門，無處不管，連圍爐宣洩已成犯罪，港人無不感到窒息。這段時間，你還好嗎？《同文》訪問了數位港人，聆聽他／她在這段日子中，如何面對社會的荒謬，承受著怎樣的情緒。我們歡迎香港讀者 inbox FB、IG，或電郵：pigeon.house@commonshk.com 訴心事，海外港人亦可以同樣聯絡方法分享當初捱過封城、今天與病毒共存的經驗，互勉之。 無論 Mask on 定 Mask off，同文團隊身在海外，繼續跟留港的大家同呼同吸。
（編按：本文「阿女」的父親「阿爸」的心聲可按下方連結閱讀。）
雖然阿爸同你講佢唔擔心，但我覺得佢勁 panic，好緊張檢測，因為佢而家冇得返工，都驚冇咗份工，所以佢想快啲做晒啲檢測，快啲開返工。
我哋強檢咗兩次。我 work from home 咗好多日，時間、日子已經有啲混亂，總之有日起身，阿爸話我知，我哋呢幢大廈要強檢。我估好多人會一早起身就去排隊檢測，所以我諗住喺屋企做住嘢先，下晝 3、4 點先出去排，而阿爸阿媽中午就落去附近個檢測站排隊。
佢哋排咗 4 個鐘都仲未得，但我諗住佢哋都差唔多到喇啩，又聽聞太和體育館少人啲，所以我就自己搭車過去，大約用咗個半鐘就搞掂。之後我再 WhatsApp 阿爸阿媽，點知佢哋仲排緊隊，嗰陣佢哋已經排咗 6 個鐘。我返到馬鞍山嗰陣，應該差唔多夜晚 7 點，成個場仲排滿晒人，出面條人龍都兜咗好多個圈，嗰陣阿爸阿媽前面大約仲有廿幾人。
佢哋最終排咗 6 個半鐘，先做到檢測。佢哋已經帶定張櫈，但阿媽話冇乜用，因為坐低一陣又要向前行。佢哋喺戶外吹風吹咗大半日，冇食過嘢，又攰又凍。我買咗啲餃子同熱豆漿畀佢哋，佢哋原本想拎返屋企食，但係太肚餓，都係當場食咗。
阿媽本身對腳唔係幾好，佢排完 6 個半鐘，搞到舊患復發，之後嗰日腳痛到落唔到床，再之後對腳都係用唔到力，行路趷吓趷吓，要用柺杖助行。我好嬲，做乜要搞到我阿媽咁？我覺得簡直係虐老。
收到消息要檢第二次嘅時候，我有諗過唔檢，因為真係好 X 煩，只要我冇染疫，冇人追查，咁我唔檢都冇人知。不過，我阿爸阿媽堅決要檢。就喺第二次檢測期嘅第一日，阿爸已經自己去咗太和體育館做檢測。因為阿媽行唔到，所以我陪佢搭的士去太和，先至順便自己檢埋。太和體育館有關愛線，我同阿媽經關愛線直入，15 分鐘就檢完。
對於疫情，我自己係唔驚嘅，我覺得就算中咗都冇乜嘢，但阿媽有慢性疾病，未打針，我好驚感染到佢，所以呢排都盡量少出街。其實我繼續有糧逗，work from home 仲好㖭，唔使好似喺office 咁畀老細監視住，而家連工都唔使扮，但對於阿爸嚟講，佢係手停口停。
如果第時仲要封城，我想像唔到會點執行、會發生咩事。政府會點派飯畀獨居長者？有人要睇醫生咁點算？係咪會有一班人會因為停工而冇咗生計？
我覺得真係黐撚線。
