「再見」，可能是近兩年香港人說得最多的字。自香港前年頒佈港區國安法，令不少港人萌生移民念頭。加拿大政府去年宣佈實施港人救生艇移民新計劃，隨即有不少港人申請到加讀書、工作移民；同時，亦有加籍港人帶同一家大小回流。
80 後、在加拿大多倫多出世的 Sharon，從小在香港長大，結婚生子。她早已計劃子女到加拿大升讀大學，加上近年香港社會環境改變，一家四口決定提前移民，於前年 7 月到溫哥華定居。
移民前，Sharon 居住柴灣杏花村，曾從事廣告、化妝品代理等工作，直至近五、六年才轉為全職媽媽。她育有一對現年約 15、16 歲子女，「出世個陣已經諗住佢哋喺加拿大讀大學」。2019 年某日，她無意中見到加拿大領事館舉辦教育展，故到場了解升學程序，「計一計條數原來 Grade 10 開始計學分，咪即係 2021 年，諗下到時先畀佢去，心情會唔會太趕呢？要重新適應生活，又要入大學考學分，影響曬咪好大鑊」，於是決定讓兒子提早一年過去。
「我哋嗰時係諗住過嚟溫哥華睇嘅，試生活睇環境，一個月後返香港」，計劃一年後才移民。但計劃往往趕不上變化，2019 年中香港發生反送中運動，加上疫情爆發後，令從事廣告業的丈夫面臨事業樽頸位，加速她和丈夫移民步伐，「2019 年決定成家移民，2020 年 2 月放盤，一個月內賣咗層樓」。
Sharon 雖在加拿大出世，但於香港長大，今次移民與很多港人一樣是新移民。不過，樂觀的她卻未曾憂慮前路，「冇諗到唔會唔得，心情真係 looking forward（期待）去到會點。去到先算，有冇屋㗎？唔知㗎，去到實有㗎啦，睇你願唔願意、鍾唔鍾意㗎啫。你份工係點，你願唔願意去做㗎啫。如果你要求好高，唔鍾意呢樣、呢個同事，咁你去邊度都唔會開心，呢個係個心態」。在訪問中，Sharon 臉上總掛上笑容，不時發出銀鈴般的笑聲，盡顯其樂觀性格。
她現於居所附近找到一份餐廳兼職，每周工作數天。「嚟之前已經有計劃，總之搵到間屋就會喺可步行嘅範圍內搵一份 part time（兼職），好 chill（放輕鬆）嘅，可能沖杯咖啡」，但現實卻相反，恰巧這間餐廳是當區最旺場的新加坡餐廳，笑言「冇諗過返工咁忙同講求速度，不過都係開心嘅」。她解釋，「總要有個時間出去，因為要步出個社會先可以建立新生活，如果唔係，你仍然喺自己（個圈）」。
Sharon 一家移民過程順利，但面對與至親好友離別，其內心五味雜陳。在她以為事事安定下來時，卻因暖氣觸發皮膚紅腫問題，才發現原來內心的負面情緒一直未有疏理。「2020 年年尾，我以為我好忙，開始 settle down（安定）完，個人冇乜嘢，原來我心裏面情緒起伏得好緊要」，又說「我啲皮膚出現咗好大嘅問題，到依家皮膚都有啲腫。但係嗰陣係全臉腫曬，第一日係咁腫，然後第二日慢慢消，之後又再腫」。
她曾向中、西醫問診但都無好轉，惟醫生都不約而同問她是否有壓力問題，「沉思一陣，我冇喎，樣樣嘢都處理好啦；但反思一下，無可能冇壓力嘅，無可能無情緒，始終離開咗屋企人、朋友」。她回想剛移民時，生活環境有很多轉變，「可能喺香港有固定教會生活，有 6年時間一齊經歷好多香港嘅問題，自己嘅問題⋯⋯嚟到新地方新轉變，但無家人和朋友相伴，嗰陣一諗呢啲就會喊，真嘅感受就喺時候開始出嚟」。
她續說：「唔知你會唔會對住阿媽係特別逞強，盡量唔好畀佢知啲唔好嘅嘢，每次都係報喜不報憂⋯⋯咁我咪話俾佢聽我軟弱個位，佢咪睇下我喊，聽下我呻，咁又過咗一關」。她坦言，自移民後與媽媽關係變得更加緊密，每日都跟媽媽 WhatsApp，更期望今年年底疫情好轉，可回港探親。
在溫哥華生活了年半的 Sharon 一家，現已適應當地生活，亦建立自己的生活和朋友圈，並無後悔移民的決定。今個農曆新年遇上疫情再度爆發，每逢過時過節喜愛大宴親朋的她說，「過年氣氛變得更加冷清，直頭烏蠅飛過都聽到，自己約幾個朋友食飯咋」，更感嘆「農曆新年嘅團年飯係應該同家人食，冇呢幾個人物喺度，已經唔係嗰回事，唯有同親戚視像聊以安慰」。
不過，她承傳了家中新年傳統，親手炮製婆婆味的蘿蔔糕，「（今年）做咗起碼 30 盒，用咗好多斤蘿蔔，keep（保存）住節日傳統送蘿蔔糕畀人，如果喺香港要整成 50 盒都有」，亦期望這個新年傳統一直做到老，再由小女兒承傳下去。為此，她特意從香港帶了一個大煲，每次可同時蒸煮 12 盒蘿蔔糕。
自小喜歡下廚的 Sharon，盡得廚藝了得的外婆和媽媽真傳，更喜與人分享煮菜過程和心得。2016 年，她設立「MAMAintheKitchen」facebook 專頁，不時直播煮食過程和分享家庭生活，至今有逾 1.2 萬人讚好；移加後亦在 YouTube 頻道記錄一家在溫哥華生活。她未來繼續經營「MAMAintheKitchen」品牌，並透露即將推出自家製食品，「希望會做到，慢慢做，有啲嘢急唔到」。
對於有港人將會或計劃來加，她一而再強調心態的重要，尤其是與伴侶一起移民的人，「你哋意願一定要一致，決定咗過嚟就要打從心底 look forward」。她更語重心長地說，彼此間「要欣賞對方，唔好怕、要有勇氣同團結」。由於加拿大外出用膳費用偏貴，若不諳煮食的人，她建議先學煮一些家常菜，笑言「煮好食啲另一半會好過啲」。
她亦希望與爸媽來加的子女明白，「其實爸爸媽媽唔係 superman（超人） 或 superwoman（女超人），每位家庭成員都有自己嘅角色，同樣都好重要，大家都需要支持或者陪伴」。她又以方皓玟《你是你本身的傳奇》鼓勵港人，「要相信你自己，唔好怕外界點睇你」。
