【《同文》現正徵集「圍城內的港人」故事】 強檢、圍封、疫苗、限聚、通行證，為求清零，香港政府的抗疫政策一日比一日高壓，甚至已跨越你家大門，無處不管，連圍爐宣洩已成犯罪，港人無不感到窒息。這段時間，你還好嗎？《同文》訪問了數位港人，聆聽他／她在這段日子中，如何面對社會的荒謬，承受著怎樣的情緒。我們歡迎香港讀者 inbox FB、IG，或電郵：pigeon.house@commonshk.com 訴心事，海外港人亦可以同樣聯絡方法分享當初捱過封城、今天與病毒共存的經驗，互勉之。 無論 Mask on 定 Mask off，同文團隊身在海外，繼續跟留港的大家同呼同吸。
一月中，政府話要撲殺倉鼠抗疫，呀媽睇到新聞，都仲識話：「咁咪好慘囉……佢哋唔係隻隻有事架嘛。」佢鬧爆林鄭。我聽到件事，就聯想到屋企兩隻貓，同佢講：「遲早連啲貓都搞埋，你個政府咁PK。」嗰陣佢未識反應。
兩隻貓一隻三歲、一隻六歲。名義上我係主人，不過其實佢哋最親都係呀媽同我細佬。兩隻嘢個家庭地位肯定高過我，我只係食物鏈最底層。
我初一去完男朋友屋企拜年，返嚟之後就開始發燒，啲徵狀一模一樣。搞到我全日都勁淆底，「明明我防疫措施做得好好，冇理由有我份架喎」。嗰陣屋企連必理痛都冇，呀媽摷咗啲清瘟解毒片畀我，係咁質我食，唯有就範啦。
呀媽知道我發燒，就開始勁驚，極嫌棄我，叫我「行開啲、行開啲」、「喺屋企都戴返個口罩」，我唯有冇乜事就匿入房。佢其實最驚兩隻貓中咗病毒會有事。或者我哋全家人被人捉去隔離，屋企二月尾又要裝修，兩隻貓無人理，咁點算？
不過其實我都好擔心。食完藥，嗰晚發惡夢：夢見自己確診，夢見貓貓畀人捉咗去人道毀滅，好X驚。
第二朝，我打去相熟診所，問係咪可以有得檢測，姑娘話只可以畀個檢測樽我，等我聽日起身再做深喉唾液，再自己拎出去驗。咁咪要等多日先有結果？我太忐忑，唯有即刻去社區檢測，好彩可能新正頭，冇人排隊。
初三，收到陰性結果，我放心晒。但呀媽就繼續勁慌張。而家基本上唔使返工，佢就掃地、抹地、清潔、消毒每日做足全套。又係咁叫我返工帶飯，唔好出去食，冇乜事唔好出街，話：「你周圍去，一陣間惹咗畀你隻貓咁點算？」
佢口罩都不停升級，由戴普通外科口罩變成戴 KF94 ，而家仲間唔中戴兩個外科口罩。佢又會亂傳師奶 group 啲流言，話我哋棟大廈有人確診；盒清瘟散未食完，佢又已經當神藥咁搶住去買多盒。
到早排，政府話要推疫苗通行證、禁止跨家庭聚會，呀媽竟然拍手話做得好。呀媽今日仲晨咁早，八點就自動波去咗排隊做檢測，但明明我哋從來都冇收到強檢通知。原來人面對政府啲無理措施，panic 到盡頭，會調轉頭支持返政府？我真係諗唔明。
