【《同文》現正徵集「圍城內的港人」故事】 強檢、圍封、疫苗、限聚、通行證，為求清零，香港政府的抗疫政策一日比一日高壓，甚至已跨越你家大門，無處不管，連圍爐宣洩已成犯罪，港人無不感到窒息。這段時間，你還好嗎？《同文》訪問了數位港人，聆聽他／她在這段日子中，如何面對社會的荒謬，承受著怎樣的情緒。我們歡迎香港讀者 inbox FB、IG，或電郵：pigeon.house@commonshk.com 訴心事，海外港人亦可以同樣聯絡方法分享當初捱過封城、今天與病毒共存的經驗，互勉之。 無論 Mask on 定 Mask off，同文團隊身在海外，繼續跟留港的大家同呼同吸。
早排有個細路仔 positive 入院，佢呀媽同我講：「我都唔知而家返唔返去好，屋企仲有第二個細路。」呢種 dilemma ，差唔多個個香港人都諗緊，當然我都唔例外。
前年疫情最初期，我原本個 ward 已經抽咗條隊。一有爆發，要徵召唔同 department 人手去做隔離病房，我哋就跟嗰條隊輪流上去。到 1 月頭開始爆第五波，見輪多兩、三個同事就到我，我都知一定要上㗎喇。
我年廿九開始就要入 dirty team。入面每日根本就忙到做唔切。隔離病房全部係收 confirmed case，喺度睇完一、兩日，醫生覺得佢情況 OK，我就 flow 佢哋落去 second-tier 大房。但其實 flow 病人落去係極多 paper work 囉，又要通知屋企人，運佢哋落去又要鎖𨋢（只停目的地），等呢等路先可以落去。然後又要清潔個𨋢、清潔好佢個位先可以收下一個 case。根本全院 transport 打晒交，我試過帶個 patient 搭𨋢落去，個同事同我講：「你等啦，你前面仲有七個 cases。」個個 patient 流轉都要搞成兩、三個鐘。
不過我暫時都仲有時間去廁所、食到個飯，但急症室嘅同事就真係如火如荼。佢哋面對嘅係無限個帳篷，無限個人喺度等。
初頭收到通知話要去 dirty team，老公梗係話唔 OK，畢竟呀仔先一歲幾，搞唔掂。不過佢本身都喺醫院做，所以好快都理解。
之後就無限個同事問我：「咦，你屋企有小朋友喎，你會唔會申請住酒店呀？」不過我又冇請工人，點都要返去湊，加上我覺得唔可以唔見個仔。我呢輪係要做六個禮拜，加埋 window period 即係成兩個月。聽講如果被派去亞博仲要做成三個月。吓？六個禮拜佢已經變咗好多啦。
所以唯有樣樣嘢小心啲。入咗 dirty team 之後，除咗我老公、我呀媽會過嚟幫手湊個仔，我就冇再同其他人接觸。
每日放工，我就噴噴噴，全身可以噴嘅地方都用酒精噴過晒，可以抹嘅地方都抹晒。返到屋企門口又做多次，跟住先會入屋，洗手再直入沖涼房。
呀仔以前一見我返屋企，就想衝過嚟攬住我，但而家唯有叫呀媽捉住佢，或者擺佢喺 play mat 個欄後面，等我沖完晒涼先放返佢出嚟。
本身我有諗過喺屋企都廿四小時戴口罩，食飯又分開食咁。我老公話：「唔使啦，一家人，邊避得咁多？」而且呀仔見到我戴口罩，實衝過嚟扯鬼咗佢，又有咩用。
我之前有餵人奶，原本都一路減緊嘅，但因為呢件事都要 sharp cut。泵出嚟都唔想畀佢飲，而且根本冇時間、冇地方泵，有奶都係開工忍到收工。
其實呀仔呢啲疫情 baby 真係好慘，一出世就經歷好多波疫情，開頭唔畀佢出街，搞到佢好驚人、好細膽，後來先畀佢慢慢接觸下其他人。而家就更加忐忑，究竟可以帶佢去邊呢？
試過收到個確診 BB，八個月大，呀媽好緊張、好緊張，問我：「姑娘呀，我今晚可唔可以瞓覺呀？你覺得我要唔要睇住佢？」我勸佢話：「入到嚟我哋就會幫你。你係要長期作戰，冇可能每日都唔瞓覺，每刻每秒都望住你個仔㗎嘛。」
呀媽就即刻問我，平時有冇帶呀仔出街。我話我有帶佢去啲冇乜人嘅公園仔，揀啲冇乜人嘅時間去行下，始終不能夠日日困喺屋企，咩人都唔見。個呀媽話，佢都係帶佢去啲冇乜人嘅公園仔㗎咋，點知都係中咗。佢真係好內疚，係咪自己帶個小朋友出街，令到佢惹到病。
做呀媽係長憂九十九㗎喇，我都好明白佢心情。
