近日有網民開設了專頁「每日關注李家超中文水平」（以下簡稱「每日」），以特別角度關心今次特首選舉，就唯一特首選舉候選人李家超的競選專頁的帖文作出批改及評分，不少帖文都出現「一片紅海」的情況。《同文》發現，「每日」作出批改後，李家超競選團隊會為有關帖文作出修正，大部分修正與「每日」的批改類同。版主阿翠（化名）向《同文》表示，李家超一直交不出政綱，亦沒有與市民 connect，中文差已成大家對他的最大印象。
「每日」在 4 月 18 日首次對李家超競選專頁的帖文作出批改。當日李家超與工業總會選委交流後發文，提及自己對香港工業的理念。「每日」評價有關帖文為「丁」級，指他將逗號置於「我的施政理念其中一項是」後「停頓奇怪」，「工業是『重大力量』」一詞不明所以，「有添加值的事項」一句亦令人費解等，「每日」為該帖文提出合共 8 項建議。
李家超競選專頁在翌日下午 1 時 25 分對有關帖文作出修正，「採納」了「每日」的 8 項建議中其中 7 項。李家超在 18 日會見進出口界的帖文，以及同日與廠商會選委交流的帖文，「每日」都有即日或在翌日上午作出批改。李家超競選專頁同樣地在 19 日下午為有關帖文進行編輯，不少修正均與「每日」的建議相同。
《同文》訪問了「每日」的版主阿翠。對於李家超修正了他的競選帖文，阿翠認為他「知錯能改」實屬好事：「可能佢都發現到自己嘅中文真係有問題。如果可以讓佢睇到自己缺憾，作出改善，作為市民好樂於見到。」
不過他不欲再就李家超改正過的內容作評分：「細個（交功課）開頭寫咗乜嘢，老師就畀個評級。你之後只不過改返佢叫你改啲嘢咋嘛，唔係重新 submit，就應該冇得重新畀分。」
阿翠表示，自己作為愛國愛港市民，一直有密切留意和關注中央大力支持下推舉的候選人。「過去兩個星期梗係睇下佢、了解佢執政理念，但政綱又未有、又未上任，你冇得評價佢做過啲乜。乜都冇，咁你咪睇下佢寫啲乜囉，睇下佢啲 post，睇下佢啲字。」
「一唔睇由自可，一睇就嚇死人，我完全睇唔明佢講啲乜嘢。」90 後阿翠利申，自己文憑試中文科考獲 5*，亦非專業人士、中文系學生、新聞工作者或作家，只是普通人：「但佢嘅中文水平應該係普通人都可以指出佢嘅錯誤。」
眼見網民亦有同感，於是他決定為此開 page，派花生讓港人輕鬆一下之餘，也想跟大家一起精進中文。
阿翠表示，雖然自己「得個睇字」，但以前都會在茶餘飯後討論特首選舉。不過對比上屆特首選舉林鄭對曾俊華，他認為今次大家的投入度明顯較低：「上一次就算係林鄭，雖然好多人對佢個印象同曾俊華差好遠，at least 林鄭本人都會有一啲形象、narrative 寫到出嚟：大家會記得佢好打得、幾十年公務員經驗、年年考第一……大家會有呢啲印象。佢做 show 都要展現自己好有愛心，畀五百蚊畀個乞衣，總有一啲嘢大家會記得，或者佢會刻意造一啲形象，展示佢想得到民意支持、佢要 connect、佢想知道市民點諗。」
「佢（李家超）啲 post 就係每日見選委、商會、人大，但係冇乜同公眾嘅 connection。最搞笑嘅嘢係，你問大家對佢有乜印象，其實大家對佢冇乜印象、冇乜認識……佢係一個咩性格嘅人呢？佢有咩特點呢？佢成個施政方針係啲乜呢？佢個政綱核心係啲乜呢？冇喎，冇人噏到㗎喎。唯一可以得到就係咩『我和我們』、『人才是一個缺口』、『同為香港開新篇』，睇完都唔知係乜嘅嘢。」
「而家有一個特點大家可以 relate 到，就係佢中文真係差得好緊要。」
作為未來香港領導人有如斯中文水平，阿翠會否接受？「唔輪到我接唔接受，嗰千五個選委接受到咁咪接受到囉。」不過他希望李家超及其團隊帶頭，上中文精進班惡補，「同為香港學中文」：「你係一個榜樣嚟㗎嘛。如果最高領導層都冇學好中文……咁對下一代嘅教育唔係咁好。」
對於未來特首，阿翠希望他能在政府內開設新職位——「正字刑警」：「一啲公然地踐踏語文底線，寫一啲語法不通嘅句字，又或者完全錯誤地使用標點符號，刻意地將一啲明知係錯或者唔啱嘅字擺落去整成奇怪嘅詞語，我覺得呢啲人應該嚴懲。」
《同文》曾向李家超競選辦查詢，是否有參考「每日」的建議修改帖文，暫未獲回覆。
