這些年，香港人流散於世界各地，不少組織相繼成立希望匯聚當地港人，舉辦市集推廣香港文化。溫哥華本月 14 日將舉辦首個「香港人市集」，主辦組織「香港屋 HK House」成員坦言，原先安排 3,000 張門票一日內售罄，對此感到預料之外，「預計到會多人參加，但無諗過咁快就清曬啲飛」，面對群情洶湧，特意在活動前兩周加推 200 張門票，結果在 5 分鐘內旋即搶購一空，組織預計今次活動有 4,000 至 4,500 人次入場。
「香港屋」於 2020 年 7 月成立，目的冀多方面推廣香港文化。Heiky 說，成立組織的契機是當時發現溫哥華有不少香港人組織成立，很多以廣東話為主，但發現當中有一個空白（gap），「無一班純講英文、local（本地）少少嘅香港人組織，見到個 gap 可以 fill（填補）」。成員大部份都是網上認識﹐「我哋唔係全部都係香港人，有啲本身係嚟咗幾耐吓嘅人，有啲係 CBC（Canadian Born Chinese，即加拿大出生的華裔），有啲直程係西人，但我哋個個都係好希望去推廣香港文化」，同時亦想幫新移民融入溫哥華文化。
80 後 Heiky 在香港出世，年幼移民到加國，她憶述「細個讀廣東話班，返中文班有幾百人，香港人社區幾興旺吓，好多語言學校，但見到呢 10 幾年嚟愈來愈少咁嘅聚點⋯⋯唔想話 take for granted（覺得理所當然）冇咗香港人文化」，感覺是時候做些事保存香港文化。
她又說，「我哋食嘅嘢唔同，語言、廣東話入面用法都唔同，結婚儀式香港同中國都有少少唔同，打麻將又唔同台灣麻將⋯⋯好似上年去市集竟然買唔到魚肉燒賣，就算係話香港街頭小食都已經唔係純正香港味」，Heiky 懷念以前市集有賣魚肉燒賣和碗仔翅，惟近年愈來愈少見，即使有該類食品，但味道已經有所分別。因此，她希望盡可能保留這些消失中的香港文化。
隨着溫哥華防疫措施放寬，加上本月為「加拿大亞洲文化遺產月（Asian Heritage Month）」，二人都認為是時候舉辨「香港人市集」。Heiky 說，「係響應緊 Asian Heritage Month，想講香港人係有自己嘅文化。見到有香港人嚟咗，或者係創緊業，又有啲喺本地做藝術家做咗好耐，但係無乜香港人知，想 highlight（強調）返，因為 HK House 之前搞活動連繫到好多呢啲人，覺得應該互相支持吓」。
Heiky（圖左）說，之前疫情期間很難和其他人聚首一堂，因此好期待在活動見到所有人。（張凡 攝）
她續說，今次籌備市集時間非常倉促，三個月前才決定舉辦，「幾個月內要物色到場地係其中困難嘅地方，又要申請准許證、招募檔主同義工⋯⋯你會見到冇 food 嘅檔口，因為呢個場地唔畀賣 open food，食物要有包裝，就算有包裝都要申請 license（牌照），所以好多嘢好多 barriers（阻礙）」。Esther 補充，申請所需准許證和牌照很遲才收到部門回覆，距離活動前兩周仍需補交一些文件，但現階段已差不多準備好。
今年香港人市集所有攤檔均充滿香港元素，包括由港人藝術家設計手工藝、香港美食、本地香港人組織等，亦安排繪畫派對、麻將館 、懷舊遊戲，文化播映等活動。Heiky 興奮地說：「有四個遊戲室，會展示啲懷舊遊戲，好似鬥獸棋嗰啲﹐喺唐人街搵返嚟，但紙版波子棋絕咗版搵唔到⋯⋯麻將係之前有個活動，開咗三枱都唔夠打，想推廣畀西人、CBC 摸下牌」。屆時，現場會播放電影《夜香・鴛鴦・深水埗》，Heiky 認為這是代表香港文化的一套電影，「片中介紹不同地道美食、懷舊餐廳，係充滿港味嘅一套片」；亦安排小禮堂讓香港人組織自行設計和舉辦活動，例如有加國港人 Youtuber「CanMen住加男人」的香港人棟篤笑 、溫哥華街坊會的新移民街坊歷程分享等。
由於坊間反應熱烈，原先打算「細搞」的香港人市集，最後變成「大搞」。市集最初打算安排 30 多個攤檔，最後加至 60 個攤檔，毫無疑問今次是「香港屋」舉辦過活動中迴響最多和規模最大。Heiky 打趣說，「每個禮拜都租多一、兩個 room（室），係冇預過咁大，好大壓力呀，仲會有好多人喺每個 post、social media message、email 問仲有冇飛，好搞笑」。
Heiky 補充，有不少港人向她說會帶子女到場，「佢哋話自己係香港人，但啲子女係 CBC，想佢哋認識返香港文化」；亦有新移民港人表示掛念香港，「想大家一齊聚下」；亦有人說「其實香港人應該嚟聚一聚，慶祝香港文化」。
Esther 說，對坊間反應踴躍感到開心，認為原因除近年新移民港人增加外，還有的是溫哥華從未舉辦過香港人市集活動。她希望透過活動，保存和推廣香港文化，同時讓這裏港人互相認識，認為將是一個特別經驗，亦很期待在活動中見到大家。
今年香港人市集在 Downtown 市中心的 SFU Harbour Centre 舉行，已招募了 100 多名義工在場協助。「香港屋」為了推廣香港文化予更多受眾，所以今次租用檔攤和入場費用全免，二人說所有費用是成員「貼錢」出來，故現場會有捐款箱，希望籌募捐款幫補活動開支。若果明年再舉辦香港人市集，她們計劃嘗試找一些贊助，物色更大場地予更多人參與。Esther 又透露﹐組織未來會舉辦行山、露營等活動，希望讓更多香港人互相認識，更快融入加拿大生活。
