「我嚟咗捷克，先知道自己係香港人」，只有36歲的她，人生的頭18年，一直受到家暴。她沒有怪責家人，還成為中學視藝科老師春風化雨，卻親睹學生創意飽受教育制度的催殘，不忍再當劊子手，毅然辭工遠走捷克深造藝術。陰差陽錯，一次在藝廊看到劉曉波銅像，如當頭棒喝，她在其銅像前，下跪、剃髮，首次以行為藝術表達政治不滿；頭髮還未長出來，因新屋嶺事件沸沸揚揚，她就跑到廣場上演抗爭者遭脫衣羞辱的一幕……她的作品總是與受苦難離不開。
「如果我可以將個人榮辱同苦難放開，好似劉曉波咁，可以做到嘅嘢就更多。」她今年3月成立文藝組織「我地」，想把藝術的柔韌轉化成長期抗爭。在儲蓄傾盡之際，她發起眾籌希望籌得營運資金和資助香港年輕人赴歐實習。眾籌限期將至，金額還未達標，擦擦眼淚的劉慧婷苦笑：「係咪叫獅子山精神？我都唔知點解，就係唔想放棄。」
在香港土生土長的藝術家劉慧婷（Loretta）旅居捷克短短三年，已在當地舉辦20多場展覽。未有感受到「藝術家脾氣」，倒是總覺得她有陣唐僧味。「佢哋被個教育制度困住，有學生仲好驚問我係咪真係可以升學讀藝術。我係劊子手，因為我都喺個制度入面。唯一做到就係上堂風趣少少，比多啲關懷同愛佢哋。」到捷克前在香港中學任教視藝科7年的她，教出不少5**、5*等DSE視藝科優才生，但15名學生僅2人繼續進修藝術課程，其餘報讀護理和社工等，明白學生對在港進修藝術的顧慮，「我唔想再喺香港教育制度入面扼殺下一代嘅創意。」
「我由細個開始已覺得自己係一個藝術家」，但有次出席展覽，一個藝術家卻對她冷嘲：「你呢個藝術圈核心外圍再外圍嘅人都過嚟嘅？」令她感覺在香港藝術家的圈子裡，視藝科老師只是「教書嘅」。加上當時面對要迎合朋輩喜愛消費、男友要求儲錢買樓結婚等的壓力，「覺得自己同香港格格不入。點解啲人寧可花時間心機去追求物質上嘅嘢？」為了尋找人生方向，她毅然辭去安穩的教席，2018年8月遠走捷克升讀碩士深造藝術，「想睇吓自己有無其他學習嘅方法、外國（教育）制度係咪好啲，都有諗學完返去再教書。」
「我係因為唔鐘意香港所以先嚟。對香港無好強烈嘅感情……但我嚟到捷克，先知道自己係香港人。」她說碩士開學後，要不斷向同學說明香港的情況，「每一日都俾人問香港咩嚟，好似變親善大使咁。佢哋亦好想知香港嘅文化，我就特登睇返香港歷史。」一直以為西方社會會較平等的她，去到捷克才發現女性很難當上教師，更聽過有男教授叫女同學回鄉耕田湊仔，「喺香港教咗7年書，原來係咁光榮嘅事。嚟到頭半年反而認識多咗自己嘅背景，開始好proud of自己喺香港出世、作為香港女性原來係咁驕傲。」對Loretta來說，這是身份認同的第一步。
「我本來係一個畫家，唔係行為藝術家」，早在未執教鞭前，有不少作品與民生議題相關，但教書忙碌就暫停了畫畫；亦有一段時間只顧追求畫功，忘記了創作藝術的政治觸覺。直至前年5月學校要求學生去觀賞他人的藝術品後再創作一份作品，Loretta在藝廊看到新展出的中國民運鬥士劉曉波的銅像，「嗰一刻個wakeup call好震撼，好想做返啲嘢。」於是她在六四30周年當日、香港反修例運動掀起序幕之前，在劉曉波銅像前下跪，更削去一頭烏黑長髮，「去honor返呢班人，佢哋甘願用幾十年牢獄痛苦都要fight for freedom」。這是她第一份揉合政治的行為藝術作品，更是對自己融入當地藝術圈的一種肯定。
隨著反抗爭運動爆發，她無法回港參與遊行，但在新屋嶺拘留爭議沸沸揚揚之際，長髮還未長好的她，在瓦茨拉夫廣場（Vaclav Havel Square）的布拉格國家劇院外，選擇把自己打扮成full gear抗爭者，演繹被人扒去衣服再「囚禁」，「當刻好心痛。透過呢兩份作品，想用自己嘅身體髮膚，去呈現出嗰種痛、嗰種生命中不能承受的輕，希望讓旁觀嘅人能夠感受到切膚之痛。」今年白色恐怖彌漫之時，她還在當地的集中營紀念館，展出多幅港版國安法被捕者的肖像。
「離開香港後我對香港人苦況感受更深，我會有種情願係自己返香港坐監嗰種心態」，她稱這些作品某程度上也是為自己有日突然被捕作出「預演」。作品離不開受苦難的她，自細遭到家暴至18歲才懂反抗，數數手指，原來苦難已佔去人生一半光陰，「如果只係用個人嘅苦難，可以喚醒到更多人……如果我可以將個人榮辱同苦難放開，好似劉曉波咁，可以做到嘅嘢就更多。」
今年3月，她與另外兩名朋友在捷克成立非牟利文藝組織「我地」，不時舉辦關於香港的活動及展覽，希望讓更多外國人知道香港的文化及現況，並成為居歐港人的聚腳點。但她說，若想「我地」長遠營運，便需港人捐款支持。近日發起眾籌籌募營運資金和希望資助香港年輕人到捷克實習，反應卻未如理想，她哽咽苦笑，「盡做囉……點解撐落去？哈，係咪叫獅子山精神？我都唔知點解，就係唔想放棄。」
