【《同文》現正徵集「圍城內的港人」故事】 強檢、圍封、疫苗、限聚、通行證，為求清零，香港政府的抗疫政策一日比一日高壓，甚至已跨越你家大門，無處不管，連圍爐宣洩已成犯罪，港人無不感到窒息。這段時間，你還好嗎？《同文》訪問了數位港人，聆聽他／她在這段日子中，如何面對社會的荒謬，承受著怎樣的情緒。我們歡迎香港讀者 inbox FB、IG，或電郵：pigeon.house@commonshk.com 訴心事，海外港人亦可以同樣聯絡方法分享當初捱過封城、今天與病毒共存的經驗，互勉之。 無論 Mask on 定 Mask off，同文團隊身在海外，繼續跟留港的大家同呼同吸。
比起之前幾波，今次特別覺得生活上所有嘢都被疫情佔據。無論有冇出街，使唔使戴口罩，都覺得呼吸困難。
疫情大過天，公司預我每日都要跟，但林鄭時不時就出嚟，日日有新措施限制你自由，聽得多情緒都特別繃緊同沮喪。工作就好似每日幫 430 記者會做傳聲筒，林鄭講咩你又講一次，聯同全世界一齊製造疫情恐慌咁。其他值得大眾關注嘅嘢就全部跟甩晒，電話卡實名制下個月就實施，但仲有冇人記得？
放工返到屋企，都仲係要圍繞住個病毒腦交戰。
成個屋企得 Daddy 未打針。佢揸開貨車，有自己車周圍去，又唔行商場，所以疫苗通行證對佢影響都細。佢唔信打針有用，覺得政府對市民增加咁多限制，係為咗討好中央。如果病毒嚴咗，打針只係為咗避免限制，去旅行、見孫仔、出街食飯，唔係為健康，佢就覺得更加無謂，更加唔想打。
政府 1 月頭開始不停吹風話要搞疫苗護照，呀媽同姑姐一聽到，就係咁叫 Daddy 打針，屋企成日鬧交。佢哋講唔掂，就打電話畀我：「你快啲說服你老竇打針啦。」
我都唔知企邊邊好。固然我唔想我 Daddy 被孤立，第時有咩家庭聚會、甚至我結婚擺酒，都嚟唔到，我會好唔開心。成家人我最親就係呀爸，我寧願全世界都唔叫，淨係叫佢。不過另一方面，之前新聞見到好多打完針唔舒服嘅個案，雖然證明唔到關聯性，但我擔心我說服、或者強逼佢去打之後，Daddy 有咩事，邊個負責呢？
成家人拗到食團年飯都仲拗緊（打針）。見大家冇乜兩句，我就話：「過年男朋友話請你哋飲茶。」姑姐句句有骨落地：「你再唔打針，人哋請你飲茶都冇得飲喇，喺屋企食風啦。」Daddy 脾氣好，都忍唔住回一句：「哼，打完針又咪係中招。打針為咗食飯架咩？」成餐飯僵到不得之了。
到新年真係約飲茶，最驚死嘅姑姐一聽到就話：「呢個時勢仲飲茶？我戴兩個口罩出街架。」話我哋個個都唔 care 個疫情。但我覺得邊度都唔去，未染疫死我都已經抑鬱死。結果成個新年就係你批鬥我、我批鬥你，互相關心嘅氣氛都冇晒。
不過政府啲措施越嚟越辣，我啲朋友聚會真係去少咗好多，搞到邊個要隔離我都良心不安。平時朝早會去上完瑜伽班叉足電先返工，而家冇埋，百無聊賴，除咗做家務就唯有又睇下新聞，或者搵下工想轉行。唔知係咪每日接收太多資訊，去到夜晚放工都熄唔到機，凌晨三點個腦都仲轉緊，失眠嚴重咗好多。
我寧願我身在外國，感染咗個病毒，喺屋企抖幾日就好自由。都唔想而家喺香港咁，好似畀人監禁住咁，好壓抑。
