香港正掀起一股移民潮，然而每個人離開原因不盡相同。「其實冇話一個好明確動機過嚟，我係屬於比較少數人，純粹係想 explore（探索）下，算後生輸得起」﹐90 後四眼仔相信「You only live once」（你只活一次），於是去年 10 月持開放工作簽證（Open Work Permit，簡稱OWP），來一場加拿大冒險之旅。
據加拿大政府推出港人救生艇計劃，港人可分別透過讀書（Stream A）或工作（Stream B）申請永居。惟四眼仔因國際學生學費貴，及暫時未有意欲讀書，故不選擇前者方式移民；後者則需大專畢業後五年內，滿足全職工作 12 個月或至少 1,560 小時的兼職工作要求，「行 Stream B 基本上你做咩工都冇問題，去珍珠奶茶舖做都 OK，但我唔得，因為我係 2016 年畢業，唔夠時間」。
手持三年工簽的他頓時陷入兩難，其後從 Youtuber 分享移民資訊時，得悉 Express Entry（快速通道）的移民途徑。Express Entry 是計算申請人的年齡、學歷、語文能力、職業及工作經驗等，達到所需分數才能獲取申請永居的邀請信。「IELTS 至少 6 至 6.5 分，若從事有關管理、技術、專家類工種，30 歲以下，個分數都唔會低。依家計過我分數 400 頭左右，變相到時要留意返分數會有升跌，睇吓會唔會符合移民局嘅要求」。
四眼仔說，在加工作滿一年便可申請此計劃，若想獲得省提名則需工作滿兩年，便可即時加 600 分。總括而言，他須三年內找到符合申請的工種及工作至少一年，否則將無法申請永居。對他來說，這算是人生中最大的冒險，「一個人去一個完全唔熟悉嘅國家生活，唔係話去旅行嗰種，係要喺度開銀行戶口、返工，感覺就同我第一次自己去旅行一樣，全程自己去計劃行程、訂酒店」。
在有限時間內，除了要適應新生活，亦要面對搵工壓力。離港前，四眼仔在一間日本公司任職項目經理，「自己都有俾壓力自己，預計嚟三個月內會有工返啦啩，但當去到第二個月都係 in（面試）咗兩間公司，都係冇第二次面試機會，你會好 down（低落）；亦試過一日收到五封 email 同你講，多謝你嘅申請但我哋決定唔考慮，加上喺朋友圈或 Signal 、Telegram 嘅搵工交流區，發現有好多人嚟咗兩個禮拜已經有 job offer（工作機會），講緊係有兩至三份，難免會令你自己更加著急」。他認為，首要千萬不要和別人比較，調整心態和期望很重要，笑言「好彩大學畢業後足足一年無嘢做，變咗呢方面有少少經驗」。
他建議，港人出發前要有兩手準備，「會唔會有第二個計劃，例如畀個時間自己，搵唔到工就行 Stream A。知道自己做啲咩，會令個心踏實啲，因為當你無工返 keep 住洗錢，係會好無安全感同信心」。同時，不要困住自己，多認識新朋友，或者出街散步、做運動令自己開心，「以我自己為例，會上 YouTube 睇試當真、小薯茄令自己開心」。
經過三個多月後，四眼仔今年初在溫哥華市中心找到一份 Assistant Manager（助理經理）工作，負責一間商場的物業管理，「個商場出租舖位，要同租客打交道，亦都有 parking（停車場）要負責管理等等」。他工作個多月仍在適應中，「人工唔高，只可講係夠我break even（收支平衡）」，但因符合快速通道的申請要求，唯有邊工作，邊尋找更好的工作機會。
在加求職多次被拒，他教路以加拿大風格的履歷表求職會有較多面試機會，「Canadian Style CV 版面係密密麻麻，分開左右兩邊，一頁兩個 columns（欄）去佈局，同埋呢度會有 AI HR 會 screen 你（份CV） keywords（關鍵字）。我依家塞爆曬 CV 就多咗啲機會，之前塞唔爆變咗回頭率好低。過往寫三至四個段落冇咁好，依家係逐個句子咁寫，就多咗人搵我，好似有銀行、跨國共享工作空間公司及自己以前做開個行嘅公司」。他亦留意到溫哥華年初有較多招聘，「可能係啲公司部門逢 3 至 4 月開始預咗請幾多人拎預算，暑假都係嘅，因為好多大學生出嚟做嘢，之後完咗可能都仲需要人，變咗會請多啲人」。
四眼仔以往從來沒來過加拿大，但來溫生活近五個月，出奇地已適應當地生活。被問對這趟冒險之旅有何期望？「我期望啲咩⋯⋯會唔會識到女朋友？（使唔使幫你招親？）哈哈，可以嘅」他笑說道﹐然後謂「唔好做啲令你後悔嘅嘢，唔想不斷揼春，埋怨自己點解嗰時唔做，You only live once，你諗下你細細個讀書、之後出嚟打工、買車、供到層樓，結婚生小朋友、夠鐘就退休⋯⋯你係咪想行條咁嘅路，定你想過得特別呢？好似過嚟加拿大係我哋呢代先可以咁方便，之前要移民好複雜，投資移民之類要好多錢，但依家唔係喎，有個方法嚟讀書、返工就有機會攞到加拿大居留權，係咪要試下呢？」
若這場冒險失敗，他說自己持有英國 BNO 護照，屆時如果 BNO 簽證仍存在，他或考慮轉赴英國定居，「真係唔得咪返香港囉，窮到燶，無晒錢咪返」。惟他不太擔心，「我嘅態度係煮到埋嚟咪食，諗晒一切可行嘅方法，做晒你可以做嘅嘢，發覺最後嘅option（選擇）都係返香港嘅時候，你都要接受呢個位。世事難料，可能我仲未申請到PR前，佢（加拿大）會再批多一、兩年 OWP 畀我，咁我咪繼續喺度盡力去嘗試」。
