張雪儀（ Winnie ）這個名字你可能覺得陌生，但成長於 90 年代、有看過有線電視播放的卡通片《櫻桃小丸子》，相信對她的聲音一定不會陌生。她是第一代「小丸子」廣東話配音員，其作品亦包括《哈姆太郎》的哈姆太郎、《魔法騎士》的鳳凰寺風、《遊戲王》的達茲，及《魔法小米路》的日高安純等。張雪儀在港從事配音工作，因香港社會環境改變，於 2021 年移居加國，雖然人在異地，但她期望未來可以教授廣東話配音，繼續將廣東話文化承傳下去，「呢一代要守護（廣東話），下一代要我哋去教（廣東話）」。
Winnie 在溫哥華生活已一年多，坦言很享受這裏生活，閒時與丈夫踏單車，到處觀光、賞花，有時還會「夾 band 」（組樂隊）。她來溫哥華的原因，是香港環境、政局改變，加上疫情期間工作減少，讓她有更多時間思考去留問題。
「成個香港唔係我認識嘅香港，心態上環境、政局都有啲令我真係唔開心嘅」，所以決定與加籍丈夫移民，嘗試到新環境展開新生活，「睇下會唔會令人舒服啲」。她與丈夫結婚十年，丈夫婚後早已打算回流加國，惟她當時將重心放在香港，故一直延後回流計劃，「始終佢係呢度公民，係時候係度交下稅，咁呢邊政府係會照顧啲退休人士，你知香港係冇呢樣嘢嫁嘛， 65 歲前都要靠自己，未衰到執紙皮，但都係辛苦囉，即有壓力嘅」。
她回想當年也是其事業頂峰，「如果要我放棄，個時嘅我可能真係唔捨得，但嚟到呢一刻，大家相處咗咁耐，佢都為我做咗好多嘢，咁係時候到我啦」。
由決定離開到起行，前後歷時約大半年時間。丈夫怕她不適應，更特意作「先行部隊」到溫哥華視察環境，安排居所等事宜，然後再回港與她一起出發。張雪儀笑說：「嗰時仲係疫情好嚴重，（兩地）隔離都隔成個月」。臨行前，丈夫怕她後悔移民決定，再三問她是否確定移民，「佢一路都唔信，直到我哋 pack 嘢，佢冇得唔信啦」。移居溫哥華至今，她坦言沒有後悔，「唯獨是會掛住媽咪，咁好好彩媽咪依家同家姐住，細佬同佢屋企人都係香港，變咗我啲姨甥女、侄仔都會 take care ，我好安心嘅」。
不過，移民最大考驗莫過於她養的兩隻櫻桃紅腿象龜，「係香港搵唔到呢啲（陸龜移民）渠道，但就畀佢係呢邊搵到渠道」，全因丈夫是加國公民，所以向加國政府申請，「 submit 一啲我哋生活上嘅相呀，證明佢都係你個 family ，你唔可以揼低佢」。然而，這個難題順利解決後﹐ Winnie 便決定離港日子，「 9 月 16 日係我哋結婚紀念日，因為時差關係，所以無論你係香港出發當日，定到溫哥華當日都係同一日，係一個特別日子，咪可以過兩次（紀念日）囉」。
當談到人到中年，移民變相要放棄香港多年建立的配音事業。 Winnie 想了一想說，「每個人都會有個時間，都唔可能永無止境，既然決定同佢（丈夫）過嚟，過新嘅生活，咁 why not build up 另一樣嘢」。為了裝備自己投入新生活，在疫情期間她特意報名保姆、孕婦按摩啦、催乳等文憑課程，「完全係脫離我本行，咁個生活改變都可以改變啫，爭在未讀整手甲咋，哈哈，咁我知道呢啲都興嘛，可以係呢邊發展囉」。
張雪儀性格豁達，認為「人有好多嘢都可以改變，就算有啲嘢幾唔 OK ，但生活上唔容許你去繼續嘅話，唔可以話係馬死落地行，但我哋係要順應，因應個時間、環境去改變，你冇可能話等到有機會先得」，可能踏出第一步後，會有意想不到的效果，「 who knows ？」
Winnie 留意到近年愈來愈多港人移民，她憂慮下一代愈來愈少人講廣東話，未來有意在溫哥華試辦廣東話配音班或閱讀班，「我都知呢度有啲機構教人講廣東話嘅，咁睇下會唔會同個啲機構合作，呢啲都要等我手頭上嘅野完曬先可以做，因為真係要去了解同搵呢啲機構⋯⋯我唔 expect 話接到嘢做，唔好諗呢樣嘢住，要睇個 market 接唔接受呢樣嘢先，好多人都話興趣班個啲，係可以嘅」。
至於會否長遠發展這方面，「最主要因為呢度好多嘢都要 tax ，呢度所有嘢都係好貴，比起香港貴好多，搵個 studio 都要相當嘅價錢，排除有冇收入都好啦，對學生嚟講都係好 heavy 嘅 loading 」。
被問到如何看香港的廣東話會否沒落？她個人視廣東話為其母語，坦言感覺廣東話有沒落的可能，「我覺得家長嘅帶動都好緊要，（如果家長覺得）小朋友學唔學廣東話都冇問題嫁啦，呢個都係好大嘅問題，加上咁多內地移民嚟咗香港，本身啲小朋友都少講廣東話，佢哋變咗會有一口流利嘅國語」，但她提醒「唔好忘記以前內地睇香港電視節目，以前內地買香港人配音係鍾意（香港）文化」。
同時，她發現現今一代香港小孩懶音問題嚴重，「真係甘拜下風、五體投地，好辛苦」，更直言廣東話沒落與教育制度有直接關係，「反而依家學校推動普通話會令到啲學生會學多咗普通話，有機會忽略廣東話」。
她曾看過一條網上短片，內容是街頭訪問廣州人講廣東話，「竟然係冇人識講廣東話，因為冇人講、屋企唔講、學校唔講，有一個受訪者就話佢呀婆會講廣東話」。對她而言，現在要更加堅持和支持廣東話，「呢一代要守護，下一代要我哋去教」。
