經營一門生意，無論是營運模式、產品設計、市場推廣等樣樣都是學問。不過，對 Louise 和 Chris 來說﹐在經營小生意中，最重要是實踐企業良心。「做 small business（小企業）你有 100% 操控權，去邊度入貨，同邊一個農場合作，做嘅包裝、入面啲卡仔都係搵返本地公司，呢啲全部自己選擇，而依啲選擇係令我可以瞓得安樂」。
Louise 憶述，在籌備 Holy Duck Chili Oil 期間，曾在網上看到一篇文章，得到不少啟發。「嗰篇 article（文章）係講點解喺香港買本地菜會貴過買大陸菜？大陸菜點解可以『監平監賤』做到一蚊一斤，而點解本地菜要貴啲？」一連串問題令她反思，在加拿大超市出售一樽中國製老乾媽辣椒油，僅三個幾加元，「其實運輸、包裝、食材都是成本，究竟工廠入面啲人收唔收足人工？農場種辣椒嘅農夫又收唔收到錢？其實點解可以做到咁平，平唔一定係好事」。
「呢個係一個 ethical practices（道德實踐），（嗰時諗）如果我喺加拿大有一個機會開始辣椒油生意，會問自己點樣做先可以平衡到盈利同企業良心」。她花了半年時間去思考有關問題﹐「點搵啲適合嘅貨源，例如確保畀辣椒我嘅農夫係收足錢；提供鴨油畀我嘅農場，並非新聞見到嗰啲，會為咗催谷鵝肝而去困啲鵝喺籠內」。最終，她如願找到本地農場提供鴨油和辣椒。
Louise 又說，加拿大小企業的營商環境算是互相支持（supportive），「好似我做辣椒油，都會幫襯其他 small business 嘅辣椒油，大家會交流喺邊買包裝平、邊度訂啲樽、喺邊度做⋯⋯所以好多移民嚟嘅朋友問做咩好，我係 highly recommend（極力推薦）佢哋 run small business（經營小生意）」。她亦提醒有意在加拿大創業的人，不能只看一個政府部門的網站資料，「原來就咁講食物安全都可以由三個政府部門管轄，包括省政府、國家等，如果外貿又屬於另一個部門，所以你需要睇好多資料，確保唔會出錯」，並強調加拿大是一個好保護國民，注重衛生、健康的一個國家。
