記憶被清洗，真相被塗白，歷史被篡改——可堅守的也許只剩下大腦。「文學書係用一個講故仔嘅方法，記錄個時代嘅感受⋯⋯仲有政治理論嘅書，係想大家睇咗之後有多啲反思，諗下未來各種可能。」移英後，阿 P 開設書店出售港台出版的文學、歷史和政治類中文書。對她來說，書本能延續記憶、延續香港文化、延續「香港人」，「至少唔好忘記點解你有個咁嘅機會可以嚟到（英國）安逸地生活。」
今年七一，喜氣洋洋。不再有政黨抬棺灑溪錢，不再有遊行集會，不再腳痛。然而地球另一端的小書店，店中央釘上《佔領立法會三小時全記錄》；三年前的七一，槍聲與血淚，頓時湧上心頭，劃破這小小空間的寧靜。別過頭想要迴避，隨意拿起一本書翻翻，盡是抗爭運動的相片。永恆的警惕是自由的代價——「逃出生天」後，越是安逸鬆懈，這記猛醒打得越痛。
店名「In common breath」，來自《願榮光歸香港》英文版其中一句歌詞；中文名則是來自前記者何桂藍參選立法會初選時的口號「同呼吸」。「真係印象好深刻，覺得就算你唔喺香港呢個地方，但只要大家係同一個理念，大家其實係呼吸緊同一口氣⋯⋯講到好似好玄咁。」90 後店主阿 P 說。
「我好鍾意香港作家嘅文學。文學書係用講故仔方法，capture 時代嘅感受。呢個係文學嘅力量。」喜愛閱讀的阿 P 去年中隨家人移英，偏愛冷門和香港出版書籍的她，曾趕在出發前「瘋狂地」入貨，「嗰時上網 search 過，（英國）係買唔到嘅，因為當時係未有其他人喺英國賣香港嘅書。台灣出版嘅書有多啲渠道訂到，但香港嘅書就難啲，除咗靠朋友寄嚟畀我，不過運費都幾貴。」
原本從事科學相關行業的 90 後阿 P，在港時沒有想過開書店，但轉到新環境，決定膽粗粗與男友開設網上書店，「當初開書店的心態係助人自助，有邊本書鍾意，我就買 10 本 20 本返嚟，自己要一本，淨低嗰啲就賣出去，當 share 吓運費哈哈。始終大家都搬唔到好多嘢過嚟，同埋我走之前嘅書就買到啫，之後出版嘅書、雜誌期刊就追唔到。」
她指，起初不確定赴英港人當中有多少仍想繼續接觸香港文化，「或者繼續記住香港嘅嘢。」不料書店去年秋季開始營運後反應不俗，「估唔到有咁多香港人嚟到英國仲 keep 住睇書，係幾感動。」後來更在英格蘭中部拉夫堡（Loughborough）開設樓上實體店，「我好鍾意去旺角啲樓上書店，有時等人、等食飯，就上去睇吓。（書）真係要你掂到睇到，先知道有無興趣，expand 到睇書嘅量。」有時還會在店內舉行分享會，「呢度坐滿晒人，仲要加凳。」
書店主打文學、哲學、歷史和政治理論中文書籍。她估計，店內不少書籍已難以在香港買賣，或被圖書館悄悄下架，例如無法在港上映的《時代革命》電影訪談錄、《反送中攝影集》及《新香港民族論》等，「就算而家香港仲可以賣，你都唔知可以延續到幾時。佢哋好似有個不能公開的禁書清單咁，個政府唔想你再睇到。你唔畀（香港）賣，我咪繼續延續落去囉。」她稱，雖然部分書籍在台灣仍然有售，「但希望喺英國、唔係華文世界嘅地方，都可以繼續有呢啲書流傳到。」
她說，最多人購買 2019 年抗爭運動相關的書籍作為記錄，「好多人話個仔好細唔知發生咩事，希望大個同佢講返，好似一種延續咁；亦有客人個老公係外國人，唔知發生咩事，就藉本書同佢解釋。」她指，傘運和魚蛋革命後，香港出版不少政治理論書籍，像是探討獨立和城邦等，自己亦不時從閱讀中反思，故店內也有不少政治書籍，希望港人不斷思考，「想大家理解吓點解我哋身處喺呢個時代，仲會發生呢啲事呢？或者我哋去點樣面對呢啲事？我哋有啲咩出路？未來嘅各樣可能，其實好靠我哋睇下人地發生咗啲咩事、行過啲乜嘢路。」
她說開設實體店後，發現有不少家庭上來，於是開始售賣兒童繪本。她指，不少隨父母移英的小朋友，在港時受疫情影響，學習到的中文很有限，赴英後更是全英語環境，只能靠父母教授小朋友廣東話，「希望嚟咗英國的小朋友都繼續識中文字、講廣東話。如果唔係，兩三代之後，已經完全冇咗呢樣嘢，香港亦都冇咗廣東話。」
不過，書店的兒童繪本不是《三隻小豬》，而是《這就是獨裁》、《請投狼柏高一票》等談到民主、自由、人權等繪本，「小朋友離開咗一個唔係普世價值嘅環境，去到一個有普世價值嘅環境嘅時候，你都要教佢㗎嘛。」阿 P 說，這些繪本也適合大人閱讀，在教育小朋友同時，大人也能了解更多，亦希望移英後的小朋友，長大後可延續「香港人」的身份、文化和價值觀。
她說，離開後的確沒有在港時「貼地」，「已經唔係住劏房、已經唔使戴口罩啦嘛，唔會感受到嗰種壓抑，或者係無咁有共鳴」，亦明白人轉到新環境，需要花很多心力和時間適應，更無法逼使人們長期維持抗爭的熱度，「就算你喺香港時係『港豬』，從來無上過街，但係你至少唔好忘記點解你有個咁嘅機會可以嚟到（英國）安逸地生活。」
她指，歷史上很多民主國家曾經歷抗爭低潮，「你未必見到蘇聯解體嘅一日，或者蘇聯解體前兩三個月，你未必想像到呢件事，你永遠唔知個轉變係幾時嚟⋯⋯就算而家香港人覺得係低潮，但中間一定有人繼續做可以做到嘅事⋯⋯點樣去做好一個香港人，去延續（香港人堅持）嘅價值，表現到香港人係一個點樣嘅民族，我覺得已經好夠。」
