去年 12 月到埗溫哥華的 Edwin，在短短兩星期內，成功獲得九間公司聘請。在香港從事銀行業務數年的他，最後選擇在一家華人按摩產品店中做售貨員，拿取溫哥華最低工資另加銷售佣金，比起在港時收入大減逾六成。但轉行數月的他，比起在香港朝九晚六、營營役役的日子，他更享受溫哥華的新生活。「以前返銀行工只係一場數字遊戲，唔知為咩而做，相反而家好實在，真係一句怨言都冇。」目前在加生活了近三個月的他由衷地說，「簡單就是美。」
2020 年起，香港政局不穩，移民潮湧現，不少港人早就未雨綢繆，四處收集移民資訊。比起他們，Edwin 其實算是後來者。去年 9 月，他無意中在 Facebook 看到移民公司廣告，得悉加拿大政府專為港人而設的救生艇計劃：只要在 5 年內獲得大專文憑或大學學位，即可申請最長 3 年的開放工作簽證（open work permit) ，為申請永居鋪路。於 2018 年碩士畢業、現年 28 歲的他正好能趕上尾班車，符合申請資格，他馬上覺得：「好抵。」
自言對政治不算敏感的 Edwin，移民不為逃離香港政治，只想為自己和下一代計劃更好的生活及成長環境。像一般香港打工仔，他先後在美國和香港完成商學位後，順利入職銀行見習生，三年多來轉過幾份工，月薪從萬多元三級跳，算是過著優渥安穩的生活。但即使能買車買樓，他不免開始質疑工作的意義。「曾經有份工，公司好似自修室，成個office得打字聲；返工遲兩分鐘，上司都會話你冇工作熱誠，因為如果你好想返工，就唔會遲到……」銀行後勤枯燥乏味的工作，讓他逐漸生厭。
同時，曾在美國求學的他，也希望下一代能像他一樣在外國接受教育。「有次我返工聽到同事話佢個仔歲半去六個面試，我問：『吓？識講嘢啦咩？』佢話依家係咁，係睇你反應。我覺得好癲、好荒謬。嗰陣都未諗移民，但覺得就算我覺得填鴨式教育 OK，但我第日個小朋友可能唔 OK 呢？既然我都喺外國讀過書，都想小朋友第日有機會享受外國教育，放學可以去踢吓波，簡單又開心 。」
於是，Edwin 在未有與家人商量下，獨自提交救生艇計劃的申請文件，大約在 10 月中就正式獲批簽證，他始與家人如盤托出。家人起初覺得他只是「貪得意」，故不支持他離港發展，「佢哋話加拿大呢邊收入會打六、七折，如果想搵大錢，就一定留喺香港，甚至返大灣區。」只是，Edwin 心意已決，一向節儉的他也不擔心來加後會因為收入銳減致使生活水平大降，於是決定於 12 月出發前往溫哥華，獨自展開新旅程。
出發前，Edwin 已在招聘網站找到了一份工作，在一家口罩工廠擔任監工，負責與中國廠商接洽，和檢查口罩生產機器，「有口罩跌咗就執返起佢」，時薪 CAD$18（約HKD$110）。本來他到埗翌日就開始上班，但甫下機，他就不甘心：「好似侮辱左自己嘅學歷咁。」他心忖，反正不難找工作，於是他就放棄了這份工作，繼續求職。沒有特定要求，只想突破自己，Edwin 嘗試銀行業務以外的工作，結果在到溫哥華的首兩個星期，他已成功獲得九間公司聘請，受聘職位包括有海鮮場文員、地產、物流、空運公司文員、司機等。
起初，Edwin選擇了時薪 CAD$23（約HKD$142）的物流公司文員一職，對於新移民來說，這算是不錯的收入。可是，他工作了兩天便果斷決定辭職，「佢係請一個人做三個人嘅野，食飯同去廁所時間都冇，同事係一路食飯一路打字。」最後，他決定把心一橫，在他的求職清單上，挑選了時薪僅達 CAD$15.2（溫哥華最低工資）的按摩產品店售貨員一職。
家人和朋友都不明白 Edwin 的決定，但他自有原因——就是要挑戰自己，發掘未知的潛能。「在香港做零售 sales 會畀屋企人鬧：『讀咁多書點會做呢啲？』但呢度唔係。入到嚟，個個同事都係大學生，呢度可以畀我重新選擇。如果可以再揀，我想試吓做一份完完全全未做過嘅工。我由畢業就入銀行，幾年轉一次工，咁人生就係咁。今次畀我可以發掘到另一個才能，分分鐘呢個才能可以勁過做銀行。」
從面對密密麻麻的銀碼及文字的後勤工作，到直接面對客人，Edwin 坦言，工作首兩星期時仍有點膽怯。「有人嚟，我就行埋側邊等佢慢慢睇，要其他人 push 我。」後來他逐漸得心應手，「先慢慢同佢哋傾計，了解佢哋嘅 lifestyle，問吓佢哋有冇揼骨按摩習慣，到佢想試機時，畀定心理準備佢，同佢講可能一開頭好痛架，要小心啲，跟住再慢慢同佢介紹吓其他產品。」
他也從工作中，得到了前所未有的成就感。曾有一名註冊脊醫想試用腳底和背脊的按摩機 ，Edwin 以英文費盡唇舌，拋出在工作兩星期內學過的所有按摩和中醫學專有名詞，最後成功售出產品。他又曾為一名老華僑客人推銷產品，最後客人付帳時，拍拍 Edwin 肩膊，表揚他親切友善的服務態度。「原來兩個月前佢嚟鋪頭試過啲機，覺得好唔中意，因為覺得啲 sales hardsell 佢，所以好快走咗。但佢話覺得我係佢今年見過最有耐性嘅 sales，所以就一次過買晒所有嘢，仲問我拎卡片，話要特別表揚我。」這事讓 Edwin 樂了好一陣子，也讓他愈來愈投入工作。「因為佢老人家，我就講慢啲。但原來咁細微嘅舉動已經會令佢覺得好窩心，咁我嗰日就好開心。你知香港返工日日都有好多怨言，但呢兩個月我真係一句都冇。」
暫時，Edwin 計劃先在溫哥華打工一年，以申請加拿大永居，之後再考牌做貸款經紀。長遠而言，Edwin 未知他會否繼續留在加拿大或回流香港，但他鼓勵香港人不要因為害怕收入減少而對移民卻步。「好多人話搵多幾年先嚟，我覺得呢句嘢好冇用。除非一個月搵十萬八萬先，如果搵得三、四萬嘅話其實你機會成本有幾大？有人之前同我講：『收入少左當賺咗呢度嘅生活。』開頭我唔明，但依家明。你喺香港賺多一萬蚊，但你可能要狂 OT，其實你係畀份工買起左你嘅生活。依度你賺少一萬蚊，但包咗你間大咗嘅屋、空氣、雪山、制度。呢度嘅生活簡單得嚟好健康，呢啲嘢其實你係賺咗。」
