辭工、賣樓、出發，Johnny 一家僅用三個月便由香港移民英國，「我打咗十幾廿年工，一直都係為搵錢。但社會運動發生後，先發現原來自己只得鈔票沒有選票。係睇唔到個未來。」辭掉高薪中層白領職位，Johnny 跑到譚仔和吉野家當打雜，全為孤注一擲實現開餐廳的夢想。
每日忙足 12 小時，Johhny 不忘在店內貼滿文宣，向英國人解釋香港情況，只因不甘噤聲炒飯渡日，「點解我可以嚟到英國？係因為背後有好多人付出咗。甚至我覺得毋需再分辨（食客）係黃定藍，我哋（餐廳）做嘅事係為香港人、為手足、為細路，你認同咪嚟（幫襯）囉。」
「想要一份叉燒飯。」適逢復活節長假期，大街甚為冷清。小路的港式茶餐廳「正嘢冰室」，坐滿香港人「圍爐」開飯。這裏不是旺角，而是英國中部小鎮拉夫堡。「唔好叫叉燒飯啦，嗰啲係畀英國佬食，試吓清湯腩啦，炆足4個鐘㗎！」老闆 Johnny 說。不消 10 分鐘，牛味濃郁的牛腩米上枱，險些連湯都飲晒。餐牌上還有焗豬扒飯、日式牛肉飯和譚仔米線等，以前在港「食到厭」的港式快餐，來到英國頓成「腸胃雞湯」，一解離鄉愁緒。
餐廳開業近一年，老闆 Johnny 一家五口在去年 3 月底抵達英國中部定居。他說，因不喜歡香港的教育制度，一直打算移民，惟各國移民門檻高，遲遲未有計劃。至 BNO 簽證推出，由決定移民起行，僅僅三個月，「喺三個月內辭職、賣樓、賣車、賣晒啲生意再轉埋錢走。」如此心急，皆因 2019 年社會運動成導火線，「真係太離譜，個轉變太大。係睇唔到個將來。當見到咁嘅環境，第時究竟係我啲細路拉我，定我拉佢？最慘係我知道真相。」
在港任文職十多年，當時從無學廚也沒有做餐廳的經驗，「但我好鐘意煮嘢食，喺出面食到樣餸好食就返屋企試吓煮，煮到同餐廳九成似。」他說，一直以來，開餐廳是他的夢想，只是香港成本太貴而未有實現，遂決定抵英後開茶記，出發前不但報讀咖啡班，更把心一橫走去譚仔廚房當打雜，「佢哋嘅食譜都畀人放晒上網，但我要知嘅係一碗米線由落單至上枱，係點樣做到又快又有品質，客人無可能等碗粉15分鐘。原來係淥完要浸凍水，有單就再渌加湯。」
餐廳另一招牌牛肉飯也是偷師回來的「成果」，「淨係個洋蔥汁底 keep 幾耐呢樣我都有排試，於是去咗吉野家返咗排廚房。原來啲牛肉個湯唔可以滾起，係 keep 喺 80 幾度，以免啲汁煲走晒，牛肉又太熟。」
Johnny 指，因起初未夠信心投資大筆資金找「清水房」開餐廳，遂上網搜尋頂手舖位，出發前意外地找到這個地方。雖然拉夫堡不是港人移民熱門地點，但接近學校，可做亞洲或香港學生生意，加上位處中部，英國各地的港人也方便前往。他續指，業主更是 1997 年之前移民到英國的香港人，「google 睇完一次就已經落訂。都唔驚佢呃我嘅，呃極都係幾千蚊啫。」
他指，自己在 5 月初接手餐廳，以為萬事俱備，但當時受疫情拖累，只能做外賣生意，不料連申請 wifi 也要等足一個月，「外賣平台要靠 wifi 連線接單，無 wifi 就要手機放數據出嚟，但就好唔穩定。嗰排真係佛系開舖，試過靜到成班同事夜晚喺度開紅酒飲。」一心心急把生意推上軌道的他說，沒有預計過行政工作會成絆腳石，像是作為主打的牛肉飯有食材是向日本供應商取貨，「由舊年 5 月到而家都成年，每一張單都有錯有漏有多有少。你以為佢好快補送？唔係㗎，係話如果我落單嘅話下次先補送，然後下張單又再錯。」
就連小事如扔垃圾也成大難題，他指餐廳需向區議會申請付費的商用垃圾桶，「每桶要畀 200 蚊港紙都唔緊要，申請完仲要等成個半月先送嚟。當時係 7、8 月嘅夏天，但完全無得扔垃圾，亦唔可以扔垃圾去第二度，係犯法嘅。臭到畀隔離投訴，但得到回覆都係要等。收到垃圾桶，佢都唔係一次過清晒啲垃圾。」最後滋生過萬條白色蟲蟲，「用火槍燒、漂白水洗都唔得。我哋做西多士，意外地發現扔咗嘅麵包皮會引白鴿，白鴿仲食埋啲蟲，好快就清晒。但代價係好多雀屎，要洗返個地。」
他說至去年 7 月逐漸開放堂食，慢慢了解客人喜好，重新設計餐牌，刻意不做成本較低的炒粉麵飯，而是主攻港式家常小菜，如啫啫雞煲和椒鹽豆腐等；也有較花心機的清湯腩、蠔餅和粥品等，「係投資好大㗎，一開頭無生意，真係要倒晒。」他指，後來獲移英港人 KOL 在網上介紹，又有在酒店當大廚的移英港人成了熟客，走入廚房「指點迷津」，令運作更為流暢，生意漸見曙光。
每日忙足 12 小時，他說比起在港時跑足 7 日數已輕鬆得多，而且更有成功感，「以前真係半夜起身覆電郵，試過兩星期都喺公司瞓，都係為買屋結婚生仔，搵得越多越開心。係 2019 年社會運動之後，原來我只得鈔票沒有選票。就算我有鈔票，又唔夠人多喎，其實冇嘢做到。做人唔可以只係睇錢。」
他說，整幢舊樓皆他承租，租金僅約港幣 2 萬元，比起月租動輒 10 多萬元、做少個客都入不敷支的香港，可以有更大的空間去表達立場，不用害怕流失客人。他表示，一樓的吉房原打算開設微型港式士多，引入日本零食，惟抵英後認識不同朋友，於是保留該房間，有時留予港人中醫師義診、採耳師做療程，甚至舉辦放映會等；另一間房則讓港人開設書店「同呼吸」，售賣港臺出版中文書。
「做清湯腩要好多個鐘，係好癡線。但就想令到佢哋（外國人）嚟到，了解一吓我哋嘅飲食文化、了解我哋呢段歷史。」他認為，店內所張貼的社會運動文宣、前線示威者的防護面罩、最後一期《蘋果日報》等，就如英式酒吧展出他們的歷史故事一樣，「香港人無選票啫，但外國人有嘛，佢哋可以用選票逼佢哋嘅政府做嘢。」
「我覺得嚟到英國已經唔需要分辨人哋黃定藍。你鍾意貼乜，你鍾意話你係乜都得㗎啦。有啲舖頭放隻青蛙出嚟，真係黃咩？有中國留學生知我哋係黃店，特登嚟食，佢哋都唔係全部小粉紅。你認同嘅咪支持囉。」他說，「要記住點解我哋而家可以離開香港？點解可以變 BC？係因為班後生付出咗好多好多。可以發聲嘅時候，我係咪應該有啲嘢可以繼續堅持做？」
