《港區國安法》實施第二年，香港的公民社會幾乎徹底潰散，但社民連仍然堅持繼續行動，今年將繼續公開招募夏季實習生，為組織尋找新血。社民連成員、前主席吳文遠甚至出獄翌日，就再次走到政府總部示威。吳文遠接受《同文》電話訪問時表示，自己經歷過坐牢，感受過在四面牆中「一籌莫展」的難捱，因此在新常態下更想尋找狹縫「盡做」。
「個狹縫其實你都唔知係咪狹縫嚟，可能摸下摸下，原來係深淵嚟，但係你摸咗先算囉……係好悲吓，但都係冇計。」
吳文遠因參與 2019 年 10 月的兩宗未經批准集結，而在去年被判入獄 14 個月。在他坐監的日子，香港的環境一日比一日惡劣，職工盟、教協、支聯會輪住解散，《蘋果》、《立場》和《眾新聞》等媒體亦一個接一個倒下，大批民主派人士、新聞工作者被捕，甚至被控以《國安法》，被無了期還押。
不過，這些消息似乎未有消磨他的意志。吳文遠在今年 4 月 30 日刑滿出獄，翌日勞動節，他又立刻穿上比卡超 T-shirt，和黨友一起走到政府總部示威，4 個人舉行 5.1 遊行。
吳文遠記得，在獄中的他，全靠電視機的無綫新聞，片面地接收一個個壞消息：「坐監最痛苦，除咗啲嘢食難食之外，其實真係你見住啲事情發生，你只可以望住埲牆，冇嘢實質可以做到。」
這樣的情況他在 2019 年的時候已經歷過一次。那年他在 6 月 13 日入獄：「總之（運動）最高峰期 6 月至 7 月我坐緊監呀嘛，望住個電視機、望住你哋，咪喺裡面咬手指…… 其實最痛苦係咁樣。」
「咁當然而家個環境唔同嗰陣時，但都係㗎，你見到好多好荒謬嘅事情發生，你連鬧一句嘅能力都冇，唔好話做其他嘢…… 你既然重獲『自由』，咁有得畀你做，咪做多啲囉。」
社民連過去每年都會舉辦暑期實習計劃，招募年輕人幫手搞 7.1 遊行、搞街站、甚至參與助選，吳文遠坦言，如今這些實戰經驗不少已經「冇得做」或「做唔到」，但今年社民連仍堅持舉行實習計劃，只想貫徹「有幾多做幾多」的精神。
「年輕人係好奇，對呢個社會有興趣、有抱負。如果我哋公民社會嘅團體全部銷聲匿跡，或者冇機會畀佢哋認識嘅話，咁啲大學生 internship，就只可以一係揀去民建聯、一係揀政府、一係揀銀行。」
「我都明白，甚至乎有啲年輕人都擔心，喺社民連做暑期工有危險。就係喺呢個充斥住恐懼同壓迫嘅環境底下，我哋希望可以透過呢啲嘗試，畀人覺得，原來我哋都仲有空間，仲有嘢可以做到。其實係好簡單嘅要求。」
自 2008 年加入社民連，吳文遠十多年來已無數次被捕、受罰：由最初罰款了事，到守行為，到後來判刑以星期、以月甚至以年計，每次的代價都越來越沉重。記者問，他預計自己現時最多可以承受幾大後果？
「無㗎……未去到嗰刻你係唔會知。你見我好似好逍遙，坐一年半載好濕碎姐，但我未試過面對 35+（初選案）嗰 40 幾個，係無了期，冇日子，同埋佢哋家人受嘅苦，我未面對過，真係答唔到。」
「如果國安法嚟到我嗰陣，我可能崩潰呢？又或者我嘻嘻哈哈，同佢講一聲『屌你』，咁就過咗去呢？唔知㗎。」
